الباعة الجائلون والشرطة بالمترو.. "لعبة عسكر ومزوغين"

رصدت محررة "البوابة نيوز" وجود مكثف للباعة الجائلين بمحطات مترو الأنفاق في خطي الجيزة -شبرا، وذلك رغم أن مصدرًا مسئولًا قد صرح أمس بتواجد الشرطة بجميع محطات المترو ومنع الباعة الجائلين من التجول داخل المحطات وتسويق بضاعتهم ولكن سرعان ما يعود الباعة الجائلون مرة أخرى للظهور.
يقول أحد الباعة الجائلين ويدعى "عبدالله": "بعد نزول الحملات لمنعنا من البيع والشراء داخل محطات المترو نظل خارج المحطات الشوية وبعدين نرجع هنعمل ايه يعنى لازم نبيع هو احنا بنعملهم ايه احنا مبنأذيش حد والناس بتشتكيش بالعكس احنا بنغمهم وهما في مكانهم".
وعن سؤاله عن فكرة نقله إلى مكان آخر رد قائلا" لا طبعا انا ببيع في المترو لأنه بيركبه اشكال والوان رايح جاى على كل الخطوط إنما لو قعدنا في مكان واحد البيع هيقل".
ومن جانبها تقول "ام سيد" بائعة مناديل: انا ببيع مناديل عشان اقدر اكل واشرب ولو بجيب لنفسي علاج لو منعونى هعمل ايه اطلع برة في الشمس ابيع مناديل.
أما "سارة" إحدى البائعات فقالت: بابيع دبابيس وطرح وتوك شعر وحاجات خفيفة بستنى المحطة تعدى عشان الحملة وابيع بين المحطات وعند وجود الأمن بشكل مكثف نعاود الرجوع مرة أخرى بعد الظهيرة، أضافت "احنا خلاص اتعودنا نشترى بضاعتنا ونبيع جوه المترو وعن سؤالها عن الحبس او دفع غرامة قالت ربنا يستر".