نقطة.. مع رضوى (الأجرة بقرش)

نقطة وهنكتب ع السطر، الأجرة لو عدّت ميت قرش، ما يهمّكوش غير بفره وسطر، وأجره تملى دماغكوا بقرش بقرش حشيش.
كلامى هنا لو مش مفهوم، والناس هتسأل قصدك إيه؟! قصدت هنا انسان معلوم، هو اللّى سايق فيها وليه.. أكدب مدام فى ضمير معدوم، وقلمى واجب برضه يلوم، شرب الحشيش مفيهوش معلش ولا بميت وش ..
وشك عليه باين مكتوب، إن أنت عامل فيها دماغ، عينك تشوفها كتاب مشطوب، والناس تتمّن روحها بساغ، عندك مفيش أبدا شئ غالى، غير بس كيفك أنت العالى، فاتح الطريق قدامك سكه، حتى الضمير نايم ع الدكه، مشوار معاك يقصف فى العمر، عشان مفيش أشارات من الحمر، ولمين تقف ومخك تلفان ..
سواق وراكب فى المقطوره، ودماغه شايله هموم بالكيل، مش عارف ان السكه خطوره، وعشان بيمشي ف عز الليل، والحجه عايز افوق أو اشوف، ف يشرب الصنف الملفوف، ويسوق فى عز العتمه طريق، وان كان فى واحد يومها برئ، هيبقى واحد تانى وغيره، قدره ان يلقى اليوم ده مصيره، ويروح ضحيه عشان الكيف ..
أنا عايزه اقولك كام معلومه، بكره اللى هتفوقلك دى حكومه، واحنا اللى هنطالب بقه منها، تكشف عليك وانت بتركنها، أو وانت ماشى ف أى طريق، وساعتها بس هتبقى غريق، وانت اللّى تبقى بجد ضحيه، سواق ومدمن فى العربيه، هتروح ساعتها ف ستين داهيه، لكن تروح أرواح ناس تانيه، أهو ده اللى يبقى حرام أو عيب، علشان دماغ طارت م الغيب ..
دقّوا الجرس واضربوا فى كلكس، عايزين حرس لضمير بالعكس، يعنى اللّى ماشي بجد شمال، نروح نبلغ فيه فى الحال، وكمان قانون يلزم بعقوبه، وضوابطه واضحه تكون مفهومه، ويكون فى رادع قوي وشديد، ويتحبس ويروح فى حديد، كفايانا فى حوادث مشئومه، وعقول كتير فاضيه ومشمومه، دقوا الجرس واضربوا فى كلكس .
وعشان كده انا قلمى بفخر، كتب فى نقطه ولسه السطر، مليان نقط ياما وهكتبها، صح وغلط وانت هتعقلها، أختار طريقك انت بحظر .