9 نصائح مهمة لترضي زوجتك في رمضان؟!

عزيزى الزوج .. انت تعلم جيدًا أن إرضاء زوجتك في رمضان مهمة قومية؛ لأن غضبها يعنى أنك ستقضي الشهر الكريم على موائد الرحمن، لذلك عليك إرضاؤها بكافة السبل الممكنة.
* عليك أن تشترى لها كميات ضخمة من الياميش حتى لو هتستلف فلوسه!.. هتقابلك بوجه بشوش وتقولك .. شكرا يا غالي.. تعيش وتجيب.
* زى ما بتشترى لولادك لبس العيد والكلام دا. لازم تعمل حسابها هى كمان، بدل ما تلاقى نفسك مقضى الشهر بدون فطار أو سحور.
* اشتر لها كل متطلبات كعك العيد وزيادة شوية، واوعى تستخسر أو تقول غالى .. علشان دا كله هيجى على دماغك ومتنساش "الغريبة" و"البيتى فور" و"البسكويت".
* اقنعها إنك نفسك الشهر دا يبقى بتاع الأسرة وبس، يعنى ليك انت وهى.. وبلاش عزومات وبلاش مصايف.. لكن لو حسيت إنها هتقلب على الوش التانى اعزم حماتك وأمرك لله.
* قبل الفطار بنص ساعة تكون فى البيت بتعمل السلطة وتساعدها فى تجهيز الفطار لأن الوقت دا بيكون وقت الذروة للنرفزة وممكن تعمل فيك حاجة.
* بعد الأكل ساعدها فى رفع الأطباق، وقدم السبت علشان تلاقى الحد .. اقصد السحور.
* اوعى تتخانق معاها على أي شيء.. وحافظ دايما على وجود مسافة 2 متر بينك وبينها لاحتياطات الأمان.
* اعزمها عند حمادة مشويات، وافطروا برة بس تكون مسجل نمرة الإسعاف على الموبايل!
* مش لازم تخليها كل يوم هى اللى تطبخ.. اتطوع مرة وريحها واطبخ انت.. وقبل العيد ساعدها انت والولاد فى كل شغل البيت.