نصائح ذهبية للهروب من نفقة الزوجة

عزيزى الزوج الغلبان المطحون، كلنا عارفين انك بتحب الكورة اكتر من عيالك فبالتأكيد مش هتسيب الماتش علشان تشتغل وتصرف على عيالك، لكن طبعا الستات الوحشة الجاحدة الناكرة للجميل بتروح ترفع عليك قضية نفقة وغالبا بتكون مصحوبة إما بطلاق أو خلع.
وللاسف الحكومة وقوانين المرأة في صفها، لكن ياعينى عليك، ماحدش اداك فرصة تدافع حتى عن نفسك، لدرجة أن وزارة الخارجية وقعت بروتكول تعاون مع وزارة العدل علشان الزوج اللى شغال برة مصر تتطبق عليهم النفقة إما عن طريق الخصم من منبع الدخل- وتبقى فضيحتك بجلاجل والناس كلها تعرف- أو أن بنك ناصر يدفع وانت تتحط على قوائم ترقب الوصول وياالدفع ياالحبس.
ولا يوجد في القانون المصرى ما يدفع عنك ذلك الظلم حتى حق الطاعة مابقاش له لزمة وضاعت هيبتك، علشان كدة هنقدم لك بعض النصايح اللى يمكن تنفعك.
*لو بتشتغل في الحكومة استقيل ودور على رزقك في حتة تانية هي ماتقدرش تثبت انك شغال فيها لأن الشغل الحكومى هيقبضوها النفقة قبل ماانت تقبض مرتبك، هتقولى اشتغل فين هقولك اسرح بغزل البنات مكسبه كبير وصعب إثباته.
* لو بتشتغل شغل خاص معروف لها، قدم استقالتك أو امسك البوفية علشان تأكد أن دخلك محدود .
* لو ناوى تسافر برة، سافر دولة مش موقعة على بروتكول وزارة العدل وبالتالى مايعرفوش انت فين ولا بتكسب كام، أو سافر إيطاليا في هجرة غير شرعية ويمكن تكون محظوظ وتغرق وهى ماتطلش منك حاجة.
* اعمل لنفسك عاهة مستديمة وقدم للقاضى اوراق تثبت انك مريض ومحتاج علاج كتير، فتصعب عليه ومايحكمش لها بشئ.
* اتجوز واحدة تانية وطلع لها اوراق مضروبة تثبت انها محتاجة علاج ومصاريف.
* اقتل طليقتك وريح نفسك ووفر فلوسك، ولو اتسجنت هتاكل وتنام ببلاش.
* اعمل نفسك مجنون وهيدخلوك مستشفى المجانين لحد ما القضية تبوظ وتخلص وهى ماتخدش حاجةن وبعدها ابقى ارجع لعقلك - دا لو فضل مكانه -.
أهم شئ خليك ندل....وانت هتقدر تهرب من النفقة.