بالفيديو.. رامي عصام: "هيلا هيلا" بداية لمشواري الفني الجديد

كشف الفنان رامي عصام عن أحدث مفاجآته الغنائية، بإطلاقه أغنية "هيلا هيلا"، في شكل فيديو كليب بصحبة فريقه "إكس"، والتي ستظهر للنور مساء اليوم الخميس.
وقال رامي، في حواره الخاص ل"بوابة الأندرجراوند": "هيلا هيلا هتكون انطلاقة جديدة جدا ليا، بشكل مختلف عن المعتاد، بعيد شوية عن طابع الثورية والأغاني الحماسية بتاعتي، وأكيد هتعجب الجمهور، وهتبقى بداية لخط غنائي جديد مع إكس، بيناقش القضايا الاجتماعية اللي بيعاني منها الشارع المصري".
كما أكد رامي أن انخراطه في مشروعه الجديد مع فرقة إكس لن يبعده عن أسلوبه الثوري المعتاد، وأنه سيكمل في أغانيه السياسية التي تعبر عن شريحة عريضة من المصريين، بدون خوف أو تردد، ولكن مشروعه سيكون بمثابة طريق مختلف للتعبير عن مكنوناته الكلامية والغنائية، مؤكدًا بقوله "عمري مهبطل اللي بعمله في أغاني الثورة والسياسة، لكن مشواري مع إكس حاجة جديدة، بلون فني مختلف، وهقدم فيه شكل ليا بعيد عن العادي، يعبر عن المشاكل الحقيقية للناس في المجتمع".
كما أضاف رامي، أن هيلا هيلا مهداة لكل عمال مصر، بمناسبة عيد العمال، تقديرًا لما يقومون به من أجل البلاد، مع لعبهم دور البطل المجهول في المجتمع، قائلًا: "بنجسد في الأغنية إزاي العامل بيعاني وبيتعب عشان بلده، وإزاي محدش بيقدر تعبه بالرغم من أهمية اللي بيعملوا".
وأشار رامي إلى أن الأغنية الجديدة أخذت فترة كبيرة من الوقت كي تخرج للنور، وأن إطلاقها اعتمد من الألف للياء على المجهود الذاتي، والإنتاج المستقل، موضحًا بقوله: "الأغنية إنتاج مستقل وذاتي، وكل اللي شاركوا في ظهورها شاركوا بدون مقابل، بالرغم من تعبهم اللي استمر كذا يوم ورا بعض في فترة تجهيز الكليب بس، وساعدنا ناس كتيرة منهم طبعا ستويو فايب، اللي بيعتبر من أهم الأماكن في مصر اللي بتدعم الفن المستقل".
ووجه رامي رسالته للجمهور، قائًلا: "أنا متأكد إن الفيديو هيعجب الناس كلها، لأننا بجد تعبنا فيه، والروح الجميلة اللي بينا أكيد هتخلي الكليب أكتر من رائع، والأغنية هتبقى مفاجأة للجمهور، ولسه فيه مفاجآت كتيرة بنحضرها مع فرقة إكس، هتبان في الفترة الجاية".