السيسي عن طلبه 100 مليار من المستثمرين: كانوا فاكريني جاي آخد فلوس الناس

قال الرئيس عبد الفتاح السيسي، إن مؤسسات الدولة يجب أن تساعد الحكومة فى كل إجراء طبقا لفهم واسع وفكر عميق لحجم القضايا التي تواجهنا، متابعا: "الاقتصاد أمر مهم جدا ومفيش كلام، لكن بناء أمة ليس فقط على الاقتصاد، ولكن على أشياء كثيرة جدا من ضمنها الاقتصاد".
وأضاف "السيسي" في كلمته خلال الجلسة الختامية للمؤتمر الاقتصادي مصر 2022: "فوجئنا فيما يتعلق بموضوع الموانئ في مصر، أن الموانئ دي تم طرحها قبل كده في إطار الاستثمار الخاص، ولا بأس من ذلك، لكن أنا كمسئول عندما أنظر إلى هذه القضايا أشوف التاريخ والنتائج، لو لقيتهم بيساعدونا في الاستمرار في المسار أكمل، لو محتاج أعدل أعدله، ولو لم أعدل يبقى مش قادر اتعامل مع المرونة الكافية في التغيير، فكان فيه أحد الموانئ عندنا الميناء اتعمل من 25 سنة ولم يتطور كثيرا وقلنا يا جماعة عايزين نعمل شبكة موانئ تليق بدولة تستطيع أن تقوم بمهام لوجيستية في منطقتها التي تتميز بموقعها الجغرافي، قلت لكامل الوزير الموضوع ده – الموانئ – يتعمل كله، قالي يافندم ده عايز 40 أو 50 مليار جنيه، قلتله يتعمل يا كامل.. أنا صريح ومش بخاف، كامل قالي مش معايا فلوس، قلتله الجيش يساعدك، طيب هل فيه رجال أعمال مستعدة تدفع 40 مليار جنيه؟ علشان نعمل الميناء من أجل بناء قدرة وانطباع لدولة قادرة على تلبية متطلبات التجارة العالمية".
وتابع: "لما جيت اعمل أول لقاء مع المستثمرين في فترة الترشح.. قلتلهم أن أنا محتاج 100 مليار جنيه لمجابهة آثار ثورة 2011 و2013. كنت خايف ان الانطباع بتاعهم اني جاي اخد .. اخد فلوس الناس"، متابعًا: "ده لا يرضي ربنا ولا هيرضي ربنا لكن لازم نشوف المسار اللي مشيت به الدولة وكانت نتائجه ايه؟".