ليلي عز العرب: كان نفسى أطلع أم كريم عبد العزيز واتحققت أمنيتى

قالت الفنانة ليلي عز العرب : "بحب أبدأ الحاجة من الصفر، ولما أحقق حاجة بحب أبدأ حاجة تانية من الصفر، قبل التمثيل كنت فى title كبير فى قطاع البنوك، كنت مدير عام رئيس قطاعين ده قبل نائب رئيس مجلس إدارة على طول، وقعدت في الشغلانة دي 30 سنة فاكتفيت، ولما كنت فى المنصب وبروح أمثل كان زمايلى بيفرحوا اوى" .
جاء ذلك خلال مداخلة هاتفية لبرنامج اللمة تحلى على شعبى إف إم تقديم شيماء السباعي.
وأضافت ليلى : "أنا زوجة مطيعة جدا وعشان أمثل اتخانقت مع جوزى خناقة كبيرة، وبطلت فترة إرضاء له، بس لما جاتلى فرصة حقيقية اتمسكت بيها اللى هى فيلم "ألف مبروك" مع أحمد حلمى، وبعد نجاحى بقى زوجي داعم بس ما بيحبش يتفرج على أى حاجة أنا فيها بس هو مش تليفزيونى عموما وبيقولى انتى بالنسبة لى مراتى مليش دعوة بالفنانة".
وتابعت : والناس بتنادينى فى الشارع بالحاجة "سامانتا" كأنى ما عملتش حاجة فى حياتى غيرها، يا إما أم الكبير ونادرا ما يتذكروا ألف مبروك حتى الكشك اللى جنب البيت بيقولى أم الكبير جت.
وعن أجمل كواليس صورتها فقالت كانت فى مسلسل "الكبير أوي"، و علاقتى بمكى هو فعلا ابنى فأنا أم الكبير فعلا، كمان الناس اللى ورا الكاميرا أولادي وإحنا عيلة كبيرة وإن شاء الله يبقى ليا نصيب أكبر فى الجزء السابع من الكبير ".
واستطردت قائلة : "التمثيل حلو فى اختلاف الأدوار، تقديم البرامج يديكى فرصة انك تقولى كلمة طيبة توصل للناس بس لولا التمثيل ما كنتش هقدر اقدم البرنامج.
وعن مسلسل "الاختيار" قالت أنا بسعد فيه حتى لو طلعت مشهد صامت، بحس كده إن ده توفيق ربنا، وده الذاكرة اللى هتفضل معانا كتير وكل ما ننسى نفتكرها، وفعلا قولت أنا نفسى أطلع أم كريم عبد العزيز و فعلا اتحققتلى الامنية." .
واختتمت ليلى قائلة :" انبسطت اوى لما كلمونى من يومين و قالولى هنكمل العميل صفر مع أكرم حسنى لأنه دور مختلف جدا و هيبقى فيلم كوميدى فظيع. وتابعت الإفطارات العائلية ولمة العيلة من العادات أو الطقوس اللى مفتقداها فى رمضان، والسنة دى فطرت فى البيت مرتين.
وأضافت : لما كنت بصور مسلسل "فوق مستوى الشبهات"، كان الدور بيجيب كآبة، واللى كان بيخرجنى من الكآبة دي هي إذاعة شعبى إف إم، وعايزة أهنى كل مستمعى شبكة راديو النيل وكل العاملين فيها وأقولهم كل سنة وأنتم طيبين وإن شاء الله عيد سعيد عليكم." .