ليلي عز العرب: كان نفسي أقدم دور أم كريم عبد العزيز وتحققت الأمنية في «الاختيار3»

قالت الفنانة ليلي عز العرب: "بحب أبدأ الحاجة من الصفر، ولما أحقق حاجة بحب أبدأ حاجة تانية من الصفر، قبل التمثيل كنت فى title كبير فى قطاع البنوك، كنت مدير عام ورئيس قطاعين ده قبل نائب رئيس مجلس إدارة على طول، وقعدت في الشغلانة دي 30 سنة فاكتفيت، ولما كنت فى المنصب وبروح أمثل كان زمايلى بيفرحوا أوى".
جاء ذلك، خلال مداخلة هاتفية لبرنامج "اللمة تحلى" على أحد الإذاعات، وأضافت: "أنا زوجة مطيعة جدا وعشان أمثل اتخانقت مع جوزى خناقة كبيرة، وبطلت فترة إرضاء له، بس لما جاتلى فرصة حقيقية اتمسكت بيها اللى هي فيلم "ألف مبروك" مع أحمد حلمى، وبعد نجاحي بقى زوجي داعم بس ما بيحبش يتفرج على أي حاجة انا فيها بس هو مش تليفزيونى عموما وبيقولى انتى بالنسبة لى مراتى مليش دعوة بالفنانة، والناس بتنادينى فى الشارع بالحاجة "سامانتا" كأنى ما عملتش حاجة فى حياتى غيرها، يا إما أم الكبير ونادرا ما يتذكروا "ألف مبروك" حتى الكشك اللى جنب البيت بيقولى أم الكبير جت".
وعن أجمل كواليس صورتها، قالت: "كانت فى مسلسل "الكبير أوي"، وعلاقتى بمكى هو فعلا ابنى فأنا أم الكبير فعلا، كمان الناس اللى ورا الكاميرا ولادي وإحنا عيلة كبيرة وإن شاء الله يبقى ليا نصيب أكبر فى الجزء السابع من الكبير".
وتابعت: "التمثيل حلو فى اختلاف الأدوار، تقديم البرامج يديكى فرصة انك تقولى كلمة طيبة توصل للناس بس لولا التمثيل ما كنتش هقدر اقدم البرنامج".
وعن مسلسل "الاختيار"، فقالت: "أنا بسعد فيه حتى لو طلعت مشهد صامت، بحس كده إن ده توفيق ربنا، وده الذاكرة اللى هتفضل معانا كتير وكل ما ننسى نفتكرها، وفعلا قولت أنا نفسى أطلع أم كريم عبد العزيز و فعلا اتحققتلى الأمنية، وانبسطت أوى لما كلمونى من يومين و قالولى هنكمل العميل صفر مع اكرم حسنى لانه دور مختلف جدا و هيبقى فيلم كوميدى فظيع".
وتابعت: "الإفطارات العائلية ولمة العيلة من العادات أو الطقوس اللى مفتقداها فى رمضان، والسنة دى فطرت فى البيت مرتين".
اقرا ايضا
ليلى علوي تكشف تفاصيل مشاركتها في «دنيا تانية»