تفاصيل نشاط الرئيس السيسي اليوم الاثنين

تفقد الرئيس عبد الفتاح السيسي جواً، اليوم الاثنين، الموقف التنفيذي والأعمال الإنشائية للعاصمة الإدارية الجديدة كما شهد الرئيس إطلاق المشروع القومي لتنمية الأسرة المصرية.
وقال الرئيس إن الهدف من المشروع هو تنمية الدولة وليس فقط الأسرة مؤكدا حالة الرضا التي تتحقق للأسرة ستنعكس على الدولة ومن ثم تتحقق حالة الاستقرار والتنمية للدولة.
وأضاف الرئيس أنه مواطن مثل كل المواطنين وقضى عمره كله في مصر وكان دائما ما يسأل عن نفسه عما تشهده والسبب في ذلك مشير إلى أنه دائما ما يتحدث عن ملف حقوق الإنسان في كل جولاته الخارجية قائلا: معندناش حاجة بنخبيها عندنا مش معروفة وهي التحديات اللي بنواجهها.. لما كنت في بلجيكا قلت للمسؤول اللي بكلمه إنت ليه مستألنيش الناتج المحلي كام سألته عن الناتج المحلي بتاعهم قالي 500 مليار دولار وعدد سكانك قالي 10 ملايين.. قولتله يبقى أنا عاوز الدخل بتاعي يبقى 5 تريلونات دولار علشان عندي 100 مليون".
وقال: قلت له علشان انا معنديش الفلوس دي الناس في مصر مظلومة ومش بتاكل كويس ومش بتتعلم كويس ولا بتتعالج كويس.. دي حقوق الإنسان اللي أعرفها مؤكد أن خروج المواطنين في 2011 كان سببه عدم وجود رضا مجتمعي
وقال الرئيس : الناس مكنتش مبسوطة بس مش عارفة ليه.. مكنتش راضية بس مش عارفة ليه.. مفيش حاجة مكفية.. مفيش تعليم كويس..وبدل ما الناس يقولوا إن أداءنا متواضع عملوا الدولة خصم وعملوا دراما.. المهم هو الحفاظ على الدولة وعدم انزلاقها مرة أخرى للخراب والدمار اللي كانت ممكن توصله 2011.. الناس صحيح كانت تعبانة وعاوزه تغير لكن تغير إزاي.. إحنا عاوزين نغير أسباب تردين".
وأعلن الرئيس أن معدلات الزيادة السكانية بلغت منذ عام 2014 نحو 14 مليون نسمة بينما لم يكن الدخل القومي مناسبًا لهذه الزيادة قائلا: أنا عاوز أعمل جامعة تدي تعليم كويس ومدرسة تدي تعليم كويس مش الناس تتخانق علشان تغشش ولادها.. الناس بتيجي في الآخر تقولي ابني معاه شهادة شغلوهلي بقى.. اللي إحنا فيه ده من 1950 هو سبب تردي الدولة".
وقال الرئيس أن قدرة الدولة ليست متماشية مع قدرتها على النمو..لو عندي مصروف 1000 جنيه فالدخل مش 1000 جنيه وبالتالي يكون هناك عجز.. أنا أتحدث عن عجز الأداء والقدرة وليس النمو وأن التحديات تزيده إصرارا شديدا على القتال والعمل من أجل الدولة
كما كشف الرئيس أن هناك 700 ألف خريج سنويا من الجامعات وأنه طلب من وزير الاتصالات أن يتم توفير فرص عمل مبنية على النظم باعتبارها أقل تلكفة مضيفا : كانت هناك مليون وظيفة متوفرة في هذا الإطار، وأن تكلفة البرنامج 30 ألف دولار للدارس.
وأكد الرئيس أن الاختبار أجري على 300 ألف خريج بينما انطبقت المعايير على 111 فقط هو المنطبق عليهم هذه المعايير..وحصل كده علشان تعليمنا تعبان قائلا: لو كان فيه 100 ألف طالب كنت مستعد أدفع تكلفة البرنامج له وفي وقت مكثف
وأكد السيسي على أهمية برنامج الصحة الإنجابية وإجراء كشف طبي حقيقي للتأكد من حصول الطفل على حقوقه قائلا: فيه حد لما بنت جات تتجوز انتظري سنة أو سنتين علشان إنتي كنتي في وعاء حضانة أسرة وهتروحي حضانة زوجية حاجة تانية فخدي نفسك عيشي يومين تتعودي على الحياة الجديدة قائلا: لا أقصد تنظيم الأسرة.. لكن ممكن تتجوز بعدها تخلف على طول، وبعد كده ممكن يختفلوا فتاخد ابنها وتمشي ويحصل الطلاق.. لازم تاخد فرصة تقعد سنة أو سنتين تتعود على البيت بمطالبه ولما تحس إنها قادرة على استيعابه تكمل اللي بعده".
وتابع الرئيس : مفيش حد بيقول لبنته كده.. لكن أنا قلت لبنتي استني على مهلك سنتين أو تلاتة على الأقل
وقال الرئيس إن الناتج المحلي في سنغافورة يصل إلى 300 مليار دولار على خمسة ملايين نسمة بينما الناتج المصري 400 مليار مقابل عدد سكان 100 مليون نسمة مضيفا: الناس ممكن تقول فيه قوائم انتظار متعالجوش.. علشان هي دي البلد.. بدل ما تجيب فيلم الإرهاب والكباب وتجيب المواطن بيشتكي وتخلي البلد خصم.. كان لازم يخلي السلبية خصم قائلا: البلد مش خصم لكن المواطن اللي مش بيشتغل هو اللي خصم.. لما حولوا البلد لخصم في 2011 هدوها ولولا فضل ربنا كان زمان مصر زي البلاد التانية اللي إحنا شايفيها لا تقوم ولا ترجع تاني
وأكد الرئيس السيسي أن هناك حاجة ماسة للعمل من أجل الدولة بعدما حفظها الله من الدمار مثل دول أخرى قائلا: قابلت واحدة ست تقولي أنا زعلانة منك أنا عندي ست عيال.. طاب أعمل إيه.. هم ساعات مش بيجيبوا الحاجات دي في التلفزيون علشان محدش يزعل.. قولتها إنتي عندك 6 وانا عندي 100 مليون.. بقول كده للدول اللي بيقولونا ليه مش بتدوا حقوق للناس.. إحنا مش لاقين ناكل ولا عارفين نعلم ولا نعالج ولا نشغل ولا نسكن".
وقال: روحوا المرج والمطرية والخصوص وشوفوا بنلاقي إيه.. هي دي بلادنا".
كما أكد الرئيس السيسي على أهمية التوعية الحقيقية بالواقع الذي تعيشه الدولة قائلا : لما جينا نصلح التعليم الدكتور طارق شوقي خد على دماغه لما مات.. الناس عاوزة تعليم ولا مش عاوزة
وقال: وزيرة التخطيط ممكن تقول معدل النمو عندنا 6% لكن اللي زي حالات عاوز 60% علشان يكون عندنا دخل محلي 5 تريليونات دولار علشان نقدم الخدمات اللي بتتقدم في أوروبا
وأضاف الرئيس أن مصر تتأثر بما تشهده الدول الأخرى فيما يخص ارتفاع الأسعار، وقال إن معدلات النمو الاقتصادي لا تساوي معدلات النمو السكاني مؤكدا أن هناك عجزا متراكما على مدار 50 سنة.
وقال: بعض الأطباء بيسافروا للخارج علشان ياخدوا مرتب كويس.. بيكون عاوز يعيش وانا مش باديله مرتب كويس.. انا عاوز أعمل كده لكني مش قادر وكمان المدرس نفس الوضع قائلا: إنه من المهم ربط سوق العمل بالتعليم لكن المواطن يريد إدخال ابنه للجامعة فقط.
وأضاف: لما أخرج آلاف الطلبة من كلية الآداب أقسام جغرافيا ولا تاريخ.. هو سوق العمل فيه الكلام ده.. إنتو عاوزين إيه.. عاوزين تعلموهم لسوق العمل ولا عاوزين تغسلوا إيديكم إنكم علموتهم وخلاص.. العدد اللي بيخرج ملوش مكان.
وقال الرئيس الرئيس أن الرواتب في مصر متدنية: هو أنا السبب ولا إيه.. لو عليا عاوز دي المواطن 30 ألف جنيه.. ربنا اللي يعلم وأن المواطن يجب أن يشارك في مواجهة التحديات مؤكدا على ضرورة إجراء فحص طبي قبل الزواج منعا لظلم الطفل الذي يتم إنجابه مؤكدا أن هناك من يعمل على زواج ابنته وهي في عمر 12 سنة، وتابع: إنتو بتعملوا إيه.. هو إحنا كده نعرف ربنا.. هل كده حلال
وأكد الرئيس أن القضية المصرية هي قضية مشتركة وليس قضية السلطة وحدها قائلا: لا يوجد نظام في مصر لكن هناك دولة متكاملة.. أنا معاكم وزيكم ولو مش قادر هافتح الباب وأديكم التحية وأمشي.. مستقبل الناس والأطفال اللي طالعة أمانة في رقابنا أمام ربنا.. اللي بيتكلم في المسجد أو الكنيسة لازم يعرف إن القضية كبيرة
وقال الرئيس السيسي إن أول طالب سيكون قد تعليمه بشكل جيد سيكون بعد 16 سنة بعد تخرجه في الجامعة وأن هذا الأمر يتطلب مساعدة من قِبل المواطنين مؤكدا على أهمية التوعية الحقيقية بالواقع الذي تعيشه الدولة
وتابع الرئيس السيسي : إقدام البعض على زواج بناتهم وهن في سن صغيرة وقال: البنت يكون عندها 14 أو 15 سنة نخليها تواجه الكلام ده.. عاوز ترتاح من أكلها.. ده صعب أوي.. ده الواحد مياكلش ويأكل ولاده ولا يعمل فيهم كده مضيفا: لما نحدد سن الزواج فإحنا مش بنقفل عليك.. إحنا شايفين وخايفين.. اللي بيفهم أكتر بيتعذب أكتر واللي مش بيفهم مرتاح
وقال الرئيس السيسي إن مشروع تنمية الأسرة يعتبر تنمية للدولة بأكملها وأضاف أن محاربة الفقر والجهل والتخلف أمر يحتاج للتكاتف من قبل الجميع للوصول إلى الغنى والعلم والتقدم مشيرا إلى أن هذا المشروع يجب أن يكون الركيزة التي يقوم عليها العمل من أجل تغيير الواقع إلى الأفضل
وشدد الرئيس على بأهمية العمل الدؤوب في كل المجالات بلا نوم ولا راحة قائلا: علينا العمل كذلك إذا أردنا وضع مصر في مكانة حقيقية على خريطة العمل وأشار إلى أنّ هذا المشروع يجب أن يكون الركيزة التي يقوم عليها العمل من أجل تغيير الواقع إلى الأفضل.
وأكد الرئيس على أهمية الحديث دائما عن ملف الزيادة السكانية قائلا: إن الاستقرار الحقيقي يتحقق من خلال رضا المجتمع مؤكدا أن الجميع عليه التحرك في هذا الإطار.