يااه ع الزمن يا عم جاب الله.. كبرت يا عم جاب الله.. لكن لسه زى ما أنت بتوزع أمل ع الناس.. بتحكى عن ذكريات الحارة والجيش وعن بركة قضمة رغيف العيش.. عن حبك الأول وعن شقاوتك ومعاكستك لبنت الجيران.. عن مية القلة وعن رابطة الفجل والكرات عن اللى مات وعاش وعن اللى عاش ومات.. عن الجدعنة والشهامة.. عن فتوات الغلابة.. ولساه في جيبك قلم يا عم جاب الله.. لسه قلمك فيه حبر رغم كل اللى كتبته ورغم كل السنين.. ياااه يا عم جاب الله حتى قلمك أصيل.. قلم ماركة وأصل.. قلم ما يبعش صاحبه ولا ينحنى ولا يزيف.. ولا يكدب ولا يكتب ظلم.. تسلم يا عم جاب الله ويسلم قلمك في جيب حتى لو بطل كتابة.. لو فضل الصمت عن الكلام.