نائب مدير مستشفى النجيلة بمطروح يعلن إصابته بفيروس كورونا

أعلن الدكتور محمد علام، نائب مدير مستشفي النجيلة بمطروح (مستشفي العزل)، اليوم الأربعاء، عن إصابته بفيروس كورونا المستجد كوفيد 19.
وكتب علام، تدوينه له عبر حسابه الشخصي على موقع التواصل الاجتماعي "فيس بوك"، تضمنت "صباح الخير عليكم وكل ايامكم بخير، ناس كتير انتقدت إن الفترة اللي فاتت وقت كتير بقضيه علي الفيس في بوستات توعيه وردود على الناس وبتسأل امال فين شغلك ومضيع وقتك، للاسف في حاجه مكنتش حابب اتكلم فيها دلوقتي عشان مبقاش سبب ذعر وقلق للناس اللي بطمنهم باستمرار ولانها حاجه متوقعه لكل طبيب وكل لما الفتره تطول فرصه حدوثها بتزيد لكن فى ناس ظلمانى ولازم اوضحلهم حاجه مهمه وانا مش زعلان منهم على فكرة.
وأضاف علام، "بس الحمد لله اتشخصت كوفيد 19 ايجابي من يوم 6 أبريل أنا كنت عارف من أول يوم انى معرض لكده، وراضي لان ده شغلى، وأنا مش زعلان ولا كنت خايف والحمد لله هتكمل على خير وحالتى اتحسنت كتير، وان شاء الله قريب اتحول سلبى واروح، ودي الحقيقه اللي كنت مخبيها باختيارى أنا اللى طلبت محدش يعرف عشان أهلي ميقلقوش اللي بيعدو الأيام وهما عارفين اللي أنا فيه وآسف انى اتاخرت كل ده، محبتش أعرفهم غير لما أكون بقيت كويس.
وأردف علام، آسف للناس اللي بطمنها باستمرار انى مقلتلكمش، بس إن شاء الله هتعدي، التزموا باللى بننصح بيه اللى حصل ده وارد لاي طبيب ولا يلام عليه احد نهائيا، ومش معرض ليه أى واحد ملتزم فى بيته او فى الشارع ده بسبب إجراءات طبية معينة، وكلنا عارفين الخطر اللى إحنا فيه وراضيين وده حسابه عند ربنا مش عاوزين حساب من بشر فيه، لأن ده واجبنا أولا وأخيراً وشرف ما بعده شرف لكل طبيب.
واستكمل علام، بشكر كل زميل ليا دكتور أو تمريض أو عامل وقف جمبي في الظروف دى عمرى مهنسالكم اللى عملتوه، وبشكر كل واحد كتب كلمة حلوة فى حقى على البوستات أنا اسف كنت بستغلكم انى أخد منكم طاقة إيجابية أعدى بيها الفترة دي، والحمد لله كلامكم كان ليه مفعول سحر الدعم النفسي شئ رائع.
واوضح علام قائلاً: "المرض حقيقى وأعراضه حقيقية والناس بتخف حقيقى رجاءاً ركزوا فى اللى تقدروا تعملوه وهتعدى والله العظيم، بس بتعدى لو التزمنا مرحلة الخطر عندى عدت، وأنا دلوقتي فى مرحلة الشفاء التام، وإن شاء الله أيام وأروح بيتى أجازه صغيرة وهتبدء الخناقه مع زوجتى واهلى علشان ارجع تاني.