على طريقة بوحة.. عم حسن يبحث عن ذبيحة بالدقي

"صبح صبح يا عم الحاج.. جزار حد عاوز".. على طريقة الفنان محمد سعد في فيلم "بوحة"، يجوب عم حسن -جزار - شوارع الدقى بحثًا عن ذبيحة يذبحها بمناسبة عيد الأضحى المبارك.
يقول حسن: "أنا شغال جزار في محل مشهور، لكن أيام العيد بتكون مختلفة وناس كتير عايزة تضحي ومش بتعرف تروح تذبح في محلات الجزارة، وأنا بمشي في الشوارع أدور على رزقي".
ويواصل: "معظم الناس اللي شغالة في محلات جزارة بتعمل كده، عشان الرزق بيكون كتير وممكن في يوم واحد أذبح أكثر من 10 ذبائح، وده طبعًا بيعوضني ماديًا عن اليوم اللي بشتغله في المحل وفيه ناس معاها رقمي بدبح ليها كل سنة وبتكلمني أروح لهم".
ويتابع عم حسن: "الأسعار بتختلف على حسب نوع الدبيحة، خروف، جمل، عجل، ده غير اللحمة وجلد الأضحية اللي بيدهالي الزبون".