"فارس".. مهندس يعشق تربية الزواحف

«فارس الفيشاوي»، 30 عامًا، ابن قرية فيشابنا بمركز أجا بالدقهلية، يعمل مهندسًا، إلا أنه يعشق هواية تربية وبيع الزواحف والحيوانات والطيور والحشرات، لدرجة أنه حول محيط منزله إلى حديقة حيوان مفتوحة بها العديد من الزواحف والحيوانات والطيور والحشرات، التى يعكف على تربيتها، وبعض أفراد أسرته أخذوا منه هذه الهواية ومنهم زوجته هبة الوكيل مدرسة اللغة العربية ونجله ساجد صاحب الثلاث سنوات.
يقول فارس الفيشاوى ل«البوابة نيوز»: «أنا خريج هندسة مدنية بس مشتغلتش بيها، وعملت بمقولة حب ما تعمل، ومن كتر حبى للحيوانات بقت كل حياتى وعملى عمرى 30 سنة، وبربى حيوانات وزواحف من 15 سنة وعندى مجموعة كبيرة من الزواحف المصرية والمستوردة».
وأضاف «فارس»: «أثناء دراستي، كنت بربى زواحف وحيوانات، وبعد كدا بدأ ناس تطلب منى أجيب لها زواحف زى اللى عندى من هنا تحولت الهواية إلى تجارة، ولما اتخرجت تفرغت أكتر للحاجة اللى بحبها وركزت فيها وكبرتها»، وابنى «ساجد» عمره الآن 3 سنوات ويعشق الحيوانات والزواحف وممكن يقضى اليوم كله معاهم وميزهقش واللى بيساعدونى فى التربية أصدقائى محمد ناصر الفيومى وأحمد كتكوت وزوجتى طبعا واقفة جنبى بتقدر تقصيرى وانشغالى معظم الوقت بسبب عدد الحيوانات المسئولة منى ومحمد ناصر دا معايا بقاله أكتر من 5 سنين شايل المزرعة والميزة انهم بيحبوا الحيوانات جدا وبيستمتعوا بالصيد».
وتابع: «عندى مجموعة كبيرة من الثعابين المصرية، ثعبان أبو السيور، والأرقم والخضارى والنرد والبسباس والهارسين والأرقم البيتى والأزرود البيتى والدساس وعندى كمان الثعابين المستوردة، الأصلة البرومية بطفرتها عندى الأصلة الكروية والأصلة الشبكة الأكبر فى العالم يصل طولها إلى 12 مترًا، ويوجد عندى تمساح ونمس وتعالب وديابة وقنافد وحرابي»، بالإضافة إلى مجموعة من الأبراص التى يستخدمها البعض فى التربية والبعض فى البحث العلمى وتتولى شركات تصدير الزواحف، تصدير البرص وتصل أنواع منه إلى 10 دولارات وهو برص أصفر البطن والأنواع الأخرى تتراوح من 2 إلى 5 دولارات، مثل برص أبو أربع نقط وبرص حاد الذيل والبرص البيتى والبرص البترى وبرص تحت الحجر وبرص أبوعين واسعة وبرص أبوكف وبرص خشن الجلد.
وأضاف: «عندى أنواع تانية من الزواحف والحشرات، فامتلك مجموعة من المفصليات مثل عقرب أسوان وعقرب باى كلر وعقرب أسود قزم وعقرب جنزير وعقرب مورس وعقرب أخضر وعقرب بلطيم وعقرب كريسكودا وعقرب أسيان فورست وأم 44 وحلزون أفريقى وصرصار مدغشقر سعره 200 جنيه، وفرخنا زواحف مصرية كتير وبعض الهواة فرخوا أصلات مستوردة وشاركت ونظمت معارض كتير لهواة تربية الزواحف والحيوانات والطيور والحشرات ولكن طموحاتى أن يبقى عندنا اكتفاء ذاتى من إنتاج الزواحف المستوردة وأنافس الأجانب ويكون فى تصريح لمربى الزواحف طالما موفر لها البيئة وعوامل الأمان وتشجيع الشباب فى الإنتاج لأن وجود الزواحف والمفصليات يساعد البحث العلمى».