مانيش قاري..شعر: ناظم نور الدين

مانيش قاري
ولا عايزك تكون واسطة
ما بيني وبين أفكاري
اللي طالعة لربنا تسجد
ولا عايزك تكون حتى
حرف ف بيت ف أشعاري
وأشعاري
تحسسني بوجوده أعبد
ضيا روحه اللي فاض فيه
وخلاني أكون إنسان
ولو عاري اني أكون إنسان
ف انا إنسان وشايل وحدي أنا
عاري
انا العاري من الزيف اللي ف قلوبكم
وف عقولكم
ورافض كل تأويلكم
وأه يا ويلكم
من اللي بتلعبوا باسمه
على حبال العقول والفكر
يا كام أراجوز وناصبين سيرك
ما نيش درويش ف حلقة ذكر
ما نيش مجذوب
مانيش كافر وعايز اتوب
انا أيوب سبع سنوات
راماني زماني بعللكم
مانيش خفاش ف ضلمة فكركوا يلطش
ومش هطفش واسيب دوري
ده أنا نوري يغطي عللكوا والضلمة
وقادر أحرق العتمة اللي ف عقولكم
بطيش ناري
مانيش قاري
ولا هقبل تحطوا حجاب على فكري
أنا ابن الحياة البكري
وطينها ف عقلي بينبت شجر بكرة
أنا فكرة ف علم الغيب
وانا اللي يجيب حقوق العجزة والمغاليب
وعمري ما اسيب سمومكم تنطلق فيهم
مانيش خايف ومتداري
ولا مسطول ومش داري
أنا نجم ف سما مداري
هموم الناس واوجاعهم
ولو يرخوا
بكلامي مرة اوجعهم
وادلعهم
ولو يتكلموا اسمعهم
وانتوا ما بتسمعوش غير صوت شياطينكم
انا ديني اللي نازل م السما ماهوش دينكم
بحواجبكم وبدقونكم
بربي استعيذ منكم
وبطلق في الفضا أذاني
يخوف حقد اباليسكم
ويهرسكم
ويطمسكم
ويظهر وشكوا التاني
وش ملمحه أذاني
وعكر صفو أفكاري
مانيش قاري
ولا اقدر اعيش جهلك
واهلي دول مش أهلك
ولا ههلك ما دمت كتابي بيميني
انا اللي تملي على ديني
وديني سماحة وتحضر
صراطه تملي يهديني
يوديني لجنة ربنا الخضرا
بحورها ما تتجمعش بعين
بحورها العين
وسور يحمي من الملاعين
وم العاملين
فتاوى تقطع الأرحام
وتوصل فتنة في حشانا
عقول بالجهل حشانا
وغشانا
فأنا رافض تضللني
وربي بعلمه ضللني
وأملني في معنى الكون
فكملني بعقلي اكون
وحملني أمانة أصون
ما يخزلني
انا اللي ربي من حب النبي
غازلني
وزلزلني كلامه لما بكاني
هو الأول مالوش تاني
وربنا قال أولوا الألباب
مقالش حمار بيقرا كتاب
مقالش اقتل ف أهل كتاب ولا زمي
مادام انسان
طهارة دمه من دمي
وابوه وامه ميختلفوش ف تشكيلهم
عن اللي عليه أبويا وأمي
انا مسلم وأخويا في الوطن قبطي
وطيبته شاربة من طيبتي
ونبته ونبتي من جدر الوطن طارح
ومتصالح ومتسامح
وف الازمات دمانا بيبقى متشابك
وينزل ع التراب جاري
مانيش قاري
ومش هقبل تكفرني
وانا العارف بربي
وربي علمني
احكم عقلي في الأشياء
واعرف منبت العلة واصل الداء
انا الترياق
وكار العلم ده كاري
انا العالم بحكم الله وانا القاري
انا اللي وصفته بالوطواط
وجاي تخش اوكاري
مانيش قاري ومش هقرى
ومش همشي وراك بقرة
هتسحبها وتغميها
وف ساقية جهل تربطها
تدوخها وتعييها
انا الانسان
ومش هتهان
ومش هتخلى عن طوبة
وذرة واحدة من داري
مانيش
قاري