"الحرنكش والكيماكوا والكيوي".. فاكهة الناس الغلابة

يقف بعربته ينتظر رزقه من بعيد، وينادى بأعلى صوته ربما يسمعه الناس يبيع فاكهة مميزة يحبها الطلبة بالأخص، باعتبارها فاكهة مززة، صحية ومفيدة، ولها فوائد عديدة، وسعرها لحد ما رخيص مقارنة بأسعار الفاكهة الأخرى.
يقول عم سعيد: «أنا بجمع بين خمس فواكه على عربيتى الخشب، وأنا دايما أتواجد فى منطقة بين السرايات بجوار جامعة القاهرة، كل يوم تلاقينى والطلبة حواليا بيعشقوا أكل المزز والمسكر، أنا ببيع الحرنكش والكيما كوا والدوم والنبق والكيوى وسكر جوز العسل، أما الحرنكش فالكيلو ب20 جنيهًا، والكيوى الواحدة بجنيه والكيما كوا بيبدأ بعشرة جنيهات للكيلو، وما برضاش أغلى فى السعر علشان الطالب معاه على قد مصروف إيده فبراعى ظروفه، وممكن أعمل واجب معاه».
وتابع: «الكيماكوا بطعم البرتقال وبيتاكل بقشره وفى حجم البلح حسب ما يحب كل واحد، والرزق يحب الخفية، ولما الطالب رجله تخف من المكان بتنقل للمترو أو موقف السيارات، المهم مكان بتتجمع فيه الناس الغلابة».
وتابع: «الناس اللى مش معاها فلوس تقدر تجيب منى اللى هى عايزاه مع إن ناس كتير مش بتهتم بشراء هذه الفاكهة باعتبارها مش مهمة زى الموز أو الفراولة أو البرتقال مع إنها لها فوائد أهم للإنسان وأرخص، وبتدخل فى الأعشاب العطرية وعلاج أمراض مزمنة كالسكر والضغط، وممكن الطازج يجفف ويتباع كأعشاب عند العطار، وممكن نشجع على زراعتها وتصديرها للخارج نعمل رواج ليها بين الدول».