نكشف كواليس قصة حب سمية الخشاب وأحمد سعد

كشفت الفنانة سمية الخشاب عن كواليس قصة الحب التى جمعتها بالفنان أحمد سعد وكللت بزواجهما الجمعة قبل الماضي.
وقالت الخشاب فى تصريح خاص ل "البوابة نيوز": "بدأت شرارة الحب الأولى وأول نظرة حب بيننا أثناء تصوير أغنية «والنبى ياما» التى قمت بغنائها ضمن أحداث مسلسل «الحلال» والذى عرض فى رمضان الماضى، وكنا فى شهر مارس، وبالتحديد يوم عيد الأم، وكانت والدتى معى بالاستوديو وأنا أسجل الأغنية، وكلمته وقتها على الموبايل وقلت له: «أحمد أنت اتأخرت مش هتيجى ولا إيه دى ماما معايا عشان حتى تقولها كل سنة وأنتِ طيبة النهارده عيد الأم؟»، بعدها بدقائق لقيته دخل ببوكيه ورد أحمر جميل مش عارفة جابوا إمتى، وأخذ والدتى بالحضن وهنأها بعيد الأم وكانت مفاجأة لوالدتى لأنها تحب الورد جدا.
وتابعت ضاحكة: "ومن بعدها مابطلش يجبلى ورود، وبعدين بدأ يقولى «وحشتينى»، ووقتها كنت مكسوفة جدا، وأول هدية جابها لى كانت سبحة من العقيق، والسبب أنه فى مرة شافنى وأنا بسبح وسألنى: «الله إيه السبحة الجميلة دى؟»، وبالصدفة كان هو أيضا فى إيده سبحة، ورديت عليه قلت له: «دايما بحب يكون فى إيدى سبحة، ودايما ذكر الله على لسانى»، عشان كده قلت إن بينى وبين أحمد التقاء روحانى، لأنى زيه قريبة جدا من ربنا، وعلى فكرة إحنا معظم الوقت بنصلى مع بعض، ودايما بنصلى الفجر حاضر، وعلاقتى بربنا علاقة خاصة جدا، وليس معنى أنى فنانة لست قريبة من ربنا، فيمكن أكون أقرب عند ربنا من كتير ممن يسخرون منى.