بالفيديو.. والد شهيد المنيا: "النهارده يوم فرح"

ساد حزن وبكاء فى قرية أبوغرير مسقط رأس الشهيد فراج محمد محمود، شهيد المنيا، فى الحادث الإرهابى الغاشم الذى وقع أمس فى رفح، وشيع المئات من أهالي مركز أبو قرقاص جنوب المنيا جثمان الشهيد إلى مثواه في جنازة شعبية مهيبة.
"البوابة نيوز" التقت بوالد الشهيد فراج والذى أكد أنه سعيد باستشهاد ولده البطل ووجه رسالة لكل والد ووالدة شهيد بأن يصبروا ويفروحوا لأن الله اختار لهم مكانة عالية.
وبكل قوة وصبر وعزيمة قال الحاج محمد محمود على "أنا والد الشهيد البطل الذى سقى دمه أرض سيناء وحقق أمنيته اللى كان بيتمناها وهى أنه ينال الشهادة لأنه كان دايمًا يقولى انا هستشهد فى سيناء ومش عاوز اتنقل من سيناء لأنها أرض الرجال".
وأضاف والد الشهيد "ليلة الاستشهاد الساعة 10 بالليل كلمنى تلفونيًا وسلم على وسلم على أمه وقالنا ده آخر اتصال ومفيش اتصال تانى قلت له استودعتك الله والساعة الرابعة فجرًا حصل ما حصل بعد خمس ساعات".
وتابع: "كنت مجند أمن مركزى فى منقباد ويوم 8 أكتوبر حصل اشتباك فى اسيوط مع الإرهابيين وأصبت وكنت سأحصل على الشهادة لكنى اتعالجت 3 سنين فى مستشفى الشرطة فى العجوزة وقلت قدر الله وما شاء فعل وكل أبنائى دخلوا الجيش عشان يخدموا بلدهم وقلبى كان محدث إن ابنى البطل فراج هيجى فى آخر ثلاث شهور وسوف يستشهد وآخر اتصال قالى شد حيلك يا بويا صحتك كويسة وكنت حاسس آخر مرة شوفته إن دى آخر مرة ويقولى حد طايل يستشهد كل مرة أشوف زملائى بيستشهدو وأنا لسه يمكن استشهد هذه المرة.
وعن أحلام الشهيد قال: "ابنى كان نجارًا مسلحًا ماهرًا وعنده أحلام يبقى مقاول كبير وانا خسرت الدنيا كها مع فراج لأنه كان ساندنى وبيقوينى والحمد لله وكنت بحلم معاه وكان بيساعدنى لأن معاشى مش بيكفينى كان يومة ب 150 جنيهًا و200 جنيه حتى لما كان يجى إجازة من سيناء لازم يشتغل أقوله إنت تعبان يقولى لا لازم اشتغل".
ووجة رسالة للإرهابين قائلا: "حسبى الله ونعم الوكيل فيهم وينتقم من هؤلاء الإرهابيين لأن بلدنا بتنزف دماء شباباها وولادنا ضايعة كل يوم شباب بيضيع وعساكر وجنود وضباط وقدر الله وما شاء فعل والحمدلله وأنا سعيد إن كل الناس كرمت ابنى وتراب الأرض بكى عليه والضباط رؤساءه كانوا بيستعجبوا عليه كان مثابر وقوى الإرادة وأصيب مرتين سابقا فى وجهه وذراعه ولم يشعر بالخوف وكان يطلب منى ان أدعو له بالشهادة وعرضت عليه اجيبله وسطة تنقله من سيناء فكان يقولى عار على اسيب المكان بتاع الأبطال واروح مكان تانى ومش هتنقل لإما اخلص الجيش او لإما اجى شهيد".
وبكى والد الشهيد قائلا: "انا لبست الكراسى لبس أبيض عشان هو دخل الجنة لأن ده فرح مش ميتم ولأنه دخل الجنة وانا فرحان بابنى البطل وجه ملفوف بعلم مصر وادفن بالعلم بتاع مصر لأنه دافع عن ارضه وعرضه ويكفى انى ابو البطل والنهارده يوم عيد وانا فرحان مش زعلان والحمد لله واقول لكل المسئولين ربنا يعينكم".
ووجه والد الشهيد رسالة للرئيس السيسى قائلا: "ربنا معاك ويقويك وربنا يعينا على الظلمة اللى بيدمرو عيالنا وانا مبسوط ان فراج راح فى مكان عالى وكنت اتمنى استشهد زيه ولولا بتر رجلى كنت روحت معاهم وحسبى الله ونعم الوكيل فى هؤلاء الإرهابيين وأنا أول من شربت من كأس الإرهاب وأقول لمصر إنها لن تضار لأنها محروسة ومهما يحصل فيها ضرب أو أى حوادث لن تخضع أبدا".