عادل العجواني: بدأت منذ عشر سنين وانتهيت الآن!

في البداية يقول عادل: عايز اعترف أن والدى كان بيشجعنى ويدفع لى في القصة القصيرة 100 جنيه وأنا صغير، عشان يشجعنى أكتب، إنما ما كانتش حاجات قوية أول كتابة حقيقية كانت سنة 2003 ودى كانت مجموعة من المقالات اللى نزلت تحت عنوان brainstorm في مجلتين باللغة الانجليزية. السلسلة كان هدفها إنها تدينا منظور مختلف شوية لبعض المسلمات اللى مالية حياتنا وبتتحكم فيها تماما زى النجاح، الحب، الموضة، الوعود والنضج والمسئولية إلخ إلخ. وبعدين كتبت كام قصة قصيرة ثم أخيرا بدأت في 2013 أكتب أول رواية ليا «الحفرة» ولما لقيت تحت إيدى حاجة ملموسة فكرت أنشر.. صفحات متراكمة بتشكل بذرة رواية، ليها بداية ونهاية وفيها فكرة وأحداث وشخصيات وحوار. كنت حاسس إنها مختلفة فعلا وإنها لما تخلص هتتنشر فعلا، خصوصا كل ما كنت اقرا حاجة سيئة جدا ووصلت انها تتنشر بالفعل.
ويكمل عادل: كان عندى امتحانات وكنت متردد أبعت الرواية لاى دار وقلت استنى لما أخلص.. المهم في يوم كلمت كام دار وكان الوقت متأخر وما كنتش متوقع رد. بس دار المصرى ردت وبالفعل كانوا مهتمين وبلغونى إنهم ممكن يردوا بسرعة. بعتلهم العمل والحقيقة إنهم كانوا محترفين جدا ردوا بالفعل خلال المدة اللى قالوا عليها وقابلت بعد كدا يوسف ناصر صاحب الدار ومضينا العقد ثم العزيز أحمد متاريك محرر الدار اللى قال ملاحظاته الفنية واللى تم تنفيذها. نقحت الرواية وراجعتها العزيزة سارة صلاح.. الغلاف خد شوية وقت لحد ما الفنان عبدالرحمن الصواف أبدعه. وعن إحساسه أول ما احتضن مولوده الجديد يقول عادل: إحساسى لما مسكت كتابى أول مرة مش ممكن يتوصف. أنا فاكر إنى فضلت ماشى بلف وأنا شايل نسخى كلها اكتر من ساعة عشان نسيت ركنت عربيتى فين. فرحة وفخر وأمل أتمنى أن كل شخص يحس بيها ولو مرة في حياته.
والحمد لله غالبية ردود الأفعال إيجابية جدا. الريفيوهات والتقييمات بتقول إنها رواية مختلفة تماما وإنها خلقت حالة استمرت لفترة بعد قراءة الرواية. وإنها خلتهم يطرحوا اسئلة كثير نحون حاجات موجودة من الأبد في حياتهم. اتردد برده كتير إن الرواية محتاجة تتقرى مرتين. بعضهم قالى على حبة اقتراحات مفيدة جدا أكيد هاستفيد منها في المستقبل إن شاء الله.
أما عن الذين تأثر بهم في كتابته عموما وكتابه الأول خصوصا يقول عادل: ما اعرفش أنا اتأثرت في كتاباتى بمين الحقيقة، إنما اكتر كاتبين قريتلهم وبحبهم هما chuck palahniuk وstephen king. والإهداء اللى في روايتى مكتوب لابنى ما كانش ساعتها عندى ابنى التانى اللى عمره لسا كام يوم. أما الشكر فكان لله ولابى ولامى ولاخى ولزوجتى ولبعض الاصدقاء. وأخيرا ل (أ.ف.) وبالفعل نسيت حد صديقة عزيزة حاططتها في شكر الطبعة التانية بعد ما قعدت اعتذرت شويتين حلوين.
أما عن كتابة الجديد فيقول عادل: كتابى الجديد مش ناوى فيه على حاجة، أنا رواية الحفرة فيها أجزاء مكتوبة من 10 سنين فاتت، وتحت إيدى رواية أخدت سنتين كمان عشان أكتبها. وانا سعيد جدا انى اخدت وقتى وشايف إن دا إدى ثقل للاحداث وللفكرة بشكل كان يستحيل حدوثه لو كنت كتبتها في سنة ولا اتنين. أنا نفسى أكمل بنفس الطريقة مش هنزل رواية تانية غير لما يبقى فيه فعلا حاجة فعلا عايز اقولها. مش مجرد إنى باحرك شخصيات وسط أحداث، وخلاص خلصت الحدوتة.
من النسخة الورقية