بشرى المرصفى تكتب : مستنى أيه أرجع لها ..

رسالة لكل مصري ومغترب
مستنى أيه أرجع لها .. بلدك حبيبتك فى أزمة وحاجة ليك .. خذها بين أيديك فى حضنك ضمهاا
أرجع بقولك لأهلك وناسك .. أرجع لذكرى حلوة وياااا أصحابك عشتها ..
لنظرة فى عيون أم وحشتها ...
صدقنى تسوى الدنيا كلها ...
أرجع لقعدة جميلة فى وسط لمة عيلة والخلان فى الأعياد ..وجمال أيام رمضان والفونيس وقمر الدين وأكل الياميش ..
مخدكش الحنين للناس الطيبين .... عم على ... وعم حسين ..
وموحشكش المشى على الكورنيش ... ساعة العصارى والذرة المشويى ... والترمس واللب والتحبيش ..
وسط الحكاوى والغناوى .. والصحبة اللى ما تتنسيش ..
دى الغربة مرة يا أبن بلدى مهما كانت المغريات ..
أرجع لوطنك وفى حضن أمك الليلة بات .. أمسح دموعها .. طمن بقدومك فزعها ..
دى فرحة رجوعك لها كل الغايات ..
بكفايك غربة بلدك بيك أولى .. أهلك صحابك وناسك أحبابك بتستناك ..
بهمتك ،، وبكدك ،، وتضحيتك ،، تبيض وجوهنا وترفع رؤوسنا بين الناس ,, وكرامة المصرى ما تنداس
فأنتظار عودتك لوطنك يا أغلى وأعز الناس ...

وأنت يا أبن بلدى يا أصيل :.
لوطنك رد الجميل وعلى أهلك أوعاك يا حر تبقى بخيل
أبن بلدى يا فلاح وواعى ..بهمة وكفاح أزرع بأيدك وأحرث بفاسك طينك وعرضك .. لأجل أرضك تصبح مراعى ..
ويهل خيرك ويعود عليك ويوصل ديارغيرك ..
يا أبو كفوف خشنة وشقوق منسيه ..كتر ألف خيرك.. يا أبو أطهر طقية وجلبيه ..

وأنت ..
أنت يا أبن بلدى يا عامل صنيعى :..
أملا مصنعك بالآلات .. اشجينا بصوت متور الماكينات ..
ابتكر أنتج وكبر.. بجودة عالية نافس وصدر .. وزرع فى الجهات ..
يا ماهر وصايغ أجمل التشكيلات ..
فى مصنعك .. فى ورشتك ... أمسك بمفتاحك .. عايزينك رافع دائماً يامجتهد رأسك ..
بفضل أنتاجك ..يأبو العزيمة القوية.. يا سيد الصنيعيه ...

وأنت كمان ...
أنت كمان يا أبن بلدى يا مهندس وبنا :..
أجعل لنا من مصر أمنا أحلى جنة .. بسواعدك القوية حقق لنا حلم للأجيال اللى جاية
أبنى مدارس مستشفيات مؤسسات .. عمر صحارى ومنشئات.. صمم طرق كبارى وممرات ..
خطط بأيدك مدن نموذجيه صناعية .. علمية .. زراعية .. سكنية .. سياحية ..
يا أبو حس فنى هندسى وعقليه معمارية .. و تسلم لنا أيديك يا أبو الإبداع والتصميمات المستقبليه..

أبن بلدى ...
أبن بلدى يادكتور طبيب
يا ملاك الرحمة والقلب الرقيق ..
أنا الضعيف المريض المستجير .. انجدنى وأرحمنى فى ضعفى يا أبن بلدى يا أطيب طبيب ..
أرفق بحالى .. وبحال عيالى..
وبجسدي وبمرضى أوعاك تتاجر وتكتبلى علاج غالى ..
يا طبيب شاطر وماهر .. أنا فى أيدك أمانه صونها تشفعلك يوم القيامة ..
راعى ضميرك فى السر والعلنيه .. دى الطب ده يا مؤمن مهنة إنسانية ..
بلمسة حنية و بسمتك الصافية الهادية النقية ترجع السعادة لقلوب مجروحة .. تصبح بعافيه وبسلامة بإذن الله.. ياااا ملاك من البشرية..

أبن بلدى يا معلم وكاتب أديب :.
دورك مهم .. مهم جداا وسط الخلائق..
ثقف بلادى ربى ولادى نمى العقول ..
أصنع لبكرا أمهر كوادر .. بإصلاحات ومقترحات ،، بندوات ومؤتمرات على رأسها شارك وبادر ..
أرفع ظلام الجهل عن عينى .. وبمصباح الهدى والفكر أرشدني ووعيني ..
فتح عقول أطفالنا على التنوير .. أعبر بيهم من خلال كتبك لعالم الأحلام الجميل ..
سافر بيهم لمدائن وعجائب الدنيا .. وعلمهم أن الحلم الكبير المحقق .. كان أصله فى يوم فكرة ..
نمى معارفهم طور مداركهم.. ليصبحو علماء أدباء ومفكرين ،، مبرمجين ومطورين
قادة ومرشدين .. لا تابعين مقلدين..
يا أبن بلدى يا معلم وكاتب أديب ..
إياك فى يوم تكذب وتخفى الحقيقية .. تشوه لى تاريخى ونضالى وكفاحى وتبعدنى عن دينى وسلاحى ..
راعى دائما أن مجتمعى شرقى محافظ ملتزم سنى ..
ماتجيش فى يوم تقولى أن الإسفاف والتعرى والإبتذال حرية رأي وإبداع .. و (( ههههههه )) أن التخلف ده منى..
لو أنت مصرى أصيل ربى النشء على الأخلاق .. قيم دينك .. ومجتمعك ،، وثوابت العلم والحكماء ..
تحية إكبار وإجلال لأهل العلم والكتاب و الأدباء..

أبن بلدى يا رجل الأعمال المصرى يا تاجر وعصرى :..
طول عمرك ذكى ونبيه ..
رزقك المولى من خيره .. واجب عليك تشكر نعمته وتوفي ..
لأهلك وناسك وأوطانك ...
استثمر وكبر اقتصاد وطنك وكفى ..
اشتغل على نهضته .. أهتم بمصالحه وخدمته..
قيم عقودك ومعاملاتك بالتراضى .. دى أهم شئ يكون ربنا راضى ..
ولا تركن لظالمين ولا الأعداء المحاربين .. ولا تأكل بالباطل أموال الناس المساكين .. ولا تخالف النظم العامة والقوانين ..
وأبعد عن الربا والخبائث وأتقى الشبهات .. بأخلاقك العالية تكون معاملاتك فى البيوع والاستثمارات..
حفظك الله يا فخر الرجال وعزة مصر يا مخلص لها من المحيى حتى الممات..
وأطمنوا يأحبابى يا مصريين .. لسه الخير موجود .. يأهل الجوود ..
رغم العتمه والغمه..
مصر الغالية ربنا حارسها ... هترجع أم الدنيا بأدين أولادها ورأسها
بكرا أحلى بأذن الله
بكرا أحلى يا مصريين
boshra_elmarsafy@hotmail.com