من بره الميدان

قلبك لو دق ف يوم
علي غير العادة
إوعاك تسمعله
واسترجع آخر
أصداء الصوت جواك
فاجئ خوفك.. واستني
يمكن تطلعلك
أي ملامح.. لقصيدة
ولأنك ثائر بطباعك
خبط علي باب التحرير.. بشويش
ادخل.. واسألي معاك
ع الشهدا.. ورغيف العيش
سيبك م اليافطات الزحمة
من أيها شيء.. يلاهيك
واستجمع من جواك
شلة أوجاعك
إحزن.. إفرح.. أصرخ لو عايز
جايز تجدد أحلامك
بطل تعتاد لهزايم
واستلقط م الميادين
راحة أنفاسك
عيش الحزن بجد
علي كل أيام الثورة
لو رجعت بيا وبيك
خارج من أي ميدان
هو إيه الفرق بين الوجع
والبكا من غير دموع
أنا اللي كنت دايما باكتمك
بين الحقائق وسنين
محتاجلك تطلعيلي
بأي صورة وأي لون
أهربيلي من وسط «الخيام»
والشباب المستمتعين
بالموت هناك
شاوريلي
علي أي اتجاه.. أروح
مفضوح مصيري في النشرات
رديلي ع نظرة الشمات
ع السهام اللي بره الميدان
رجعيني تاني ليكي
وارجعيلي ثورة تانية
ومعاكي الأمان