كان عندي ضبطية شقية من شقاوتها بقت طرطور

كان عندي ضبطية شقيه شقيه من شقاوتها بقت طرطور ” هكذا سخر زين خيري علي موقع التواصل الاجتماعي بالفيس بوك من قرار الضبطية القضائية للمواطنين واعتذر لفؤاد حداد ،ولأن الشباب لم يبق لهم الا السخرية من الاوضاع المتردية لمصر من باب “هم يبكي وهم يضحك ” اتخذوا ايضا قرار الضبطية مجالا كبيرا للسخرية البعض اعتبرها محاولة لتحقيق امل المصريين منذ الصغر في العمل كضابط شرطة والبعض الاخر اعتبرها فرصة ذهبية للتخلص من الاخوان فجاء البيان التالي لينتشر علي جميع الصفحات ويوافق عليه الجميع “أعلن انا المواطن المصري اني اؤيد منح الضبطية القضائية للمواطنين وادعو المصريين الي ضبط كل اعضاء مكتب الارشاد ومرسي والشاطر وميليشياتهم بتهمة تخريب مصر وقتل المصريين وادعو المصريين الي سرعة القبض علي النائب العام بتهمة التحريض علي انتهاك السلم العام والدعوة الي حرب اهلية .
ولأن شر البلية مايضحك علق احد المواطنين علي خبر امس الأول يؤكد بدء تطبيق الضبطية القضائية وقبض المواطنين علي بعضهم امام قصر النيل فقال : الناس كلها عمالة تجري ورا بعض في الشوارع وبيمسكوا بعض بس انا الحمد واحد جاي يمسكني قلت كهرباء ، اما احد التعليقات الأخري التي تؤكد كوارث موجودة في المجتمع المصري فكان “لو عجبتك بنت حلوة بلاش تتحرش بيها خدها بامر الضبطية القضائية علي البيت علي طول …ولأننا في زمن الفريسكا فلا اي اندهاشة .
اما اطرف التعليقات فكانت انك في عهد مرسي ممكن تبقي “مواطن ومخبر وحرامي، وتعليق آخر تساءل “هو لو بشار طلع ضبطية قضائية كان ايه اللي حصل ؟”.
اه والله كان هايحصل ايه ساعتها ؟ طيب هايحصل ايه لو الناس قبضت علي بعضضها عشان مثلا واحد شكله مش عاجب واحد تاني ولا عشان واحد متضايق من واحد تاني ،طيب وقتها القانون هايعمل ايه هايتعامل ازاي …ولا علي ايه بقي احنا اصلا مش في دولة قانون واسألوه سيادة الرئيس المختفي …!!
للعلم قارئي العزيز منح الضبطية للمواطنين شيء عادي والنائب العام فقط اعلنه لان الدستور اللي كلنا لبسناه حضراتكم اصلا بيدي حق تقويم الافراد للمجتمع يلا ياجدع بلا شرطة بلا هباب بلا قانون بلا شاطر .
وكده تبقي الثورة بتنجح اللي عايز يشتغل ظابط يشتغل واللي عايز ياخد حقه ياخده شكرا سيدي الرئيس …