قصائد عامية..ماجد أبادير

ماجد أبادير
طلقة موت ..
ماتضربنيش بطلقة موت
وتستني السماح والصبر
مانيش هالحق يكون لي صوت
يادوب الحق ..
مكان ف القبر
………………
صباح الفل
صباح الفل يا بلادي
علي البايتين ليليتهم
لما صبح الصبح في المصنع ف وردية
علي الطالعين مع الفجر
اللي شقشق فوق خطاويهم
فواعلية
علي المهموم باحوالك
علي المظلوم علي بابك
علي اعتابك انا صليت
الهي يحرسك م الشر
ولا جاشي علي بالي ف جيبي كام ؟؟؟؟
ولا اني باعد الباقي م الشهر اللي مش ماشي
ما بقدر انام
تعيشي حرة رافعة الراس
وانا خدي يا بلدي مداس
وهمي ادفنه ف كراس
ولا ابوحشي بوجيعتي لحد
فيشوفك بخيلة ف يوم علي عيالك
ولو كان حد يسألني
هاقول عاشق انا حالك
ولو كان الضلام حالك
واشوف الضي ملو العين وملو القلب
ولا يشمت في بلدي خسيس
ولا يفرح ولاد الكلب
……………………
عينيها البحر …..
وانا ع البر وف حالي
وكنت اظن ان البحر
ياما بعيد
لقيته ف ثانية قدامي
ف نني عيونها من جوا
بنفس الرهبة والقوة …
بدوامته وموجه الرعب…
بنفس اللؤم
بيدعيني عشان ادخل
ويغريني عشان اثبت لنفسي حاجات
فيسحبني
وانا احاول عشان افلت
فمقدرشي ….
ساعتها عرفت سر البحر
واجمل شئ ف كونه البحر ……
انه غريق ….
…………………………
ماتطبقيش روحي …
ماتطبقيش روحي ..
وترصيها ف الضلفة مع القمصان
فيقوموا يتمردوا
ع الكتمة والحرمان
ويحودوا ع الرف
اللي فيه الهدوم الرهيفيين جدا
ويرقصوا مع بعض رقصة ناعمة سلو
وبعدها تانجو
ويرقصوا الحيطان
ماتطبقيش روحي
وترصيها ف الضلفة مع القمصااااااااااااان ..
…………………
ماتزعليش
ماتزعليش مني
لما اشطب ..علي كل التواريخ المجيدة
واغير القوانين
علشان مااشوفك
عروسة بجد
مش عروسة نيل ..
………………………………….