السيسي للمصريين: «مابنبيعش الوهم ومابنخفش من تهديدات»

مجد يُصنع، وتاريخ يكتبه المصريون بسواعدهم غير عابئين لما يُدبر بخسة لعرقلة مسيرة الوطن، فكر المصريون في سيناء وتأملوا حركة التنمية والتجارة منها وإليها، فقرروا ألا تقتصر عملية النقل علي معديات هيئة قناة السويس، وكوبري السلام، ونفق الشهيد أحمد حمدي، فالأمر يتطلب إنشاء محاور رئيسية لربط شرق القناة بغربها.
كان التفكير في تنفيذ أنفاق الإسماعيلية وبورسعيد لربط سيناء بالوادي، فكان أحد أهم المشروعات العملاقة والتنموية لتخفيف الضغط عن العبارات، والتي كان يطول الانتظار بها للعبور لأيام، والآن سيكون العبور خلال ساعات معدودات.
وشهد الرئيس عبد الفتاح السيسي، افتتاح عدد من المشروعات التنموية الجديدة في مدن قناة السويس، بجانب عدد من الكباري العائمة التي تربط بين الإسماعيلية وسيناء، واستعراضًا لقدرات سفينة الإمداد أحمد فاضل.
وجه الرئيس الشكر لهيئة قناة السويس علي الجهد الكبير الذي بذله العاملون بالهيئة، مشيرًا إلي أن ما حدث من حفر الأنفاق تطور كبير، وقال الرئيس: "حدثت تطورات كتير، وحسيت إن الناس قلقت شوية.. لا يمكن يكون فيه قلق يا مصريين والكلام ده كلام ما بنتكلمش فيه كتير، إحنا ماشيين بفضل الله وخطي جيدة وقلت لكم إن مش هنبيع الوهم ليكم، وهنكون مخلصين معاكم، واللي نقدر نعمله بفضل الله هنعمله واللي منقدرش هنقول منقدرش، إحنا ماشيين كويس بالفعل".
أضاف: "هنقدم اللي تم تنفيذه واللي هيستكمل حتي 30 يونيو وما بعدها، وهتشوفه حجم العمل اللي عمله شعب مصر.. حاجة عظيمة وتشرف، إحنا بنتفرج ونفتتح أنفاق قناة السويس، كان من المخطط تنفيذ حفر أنفاق القناة في 12 سنة، بواقع كل نفق 4 سنوات، إحنا بدأنا في التعاقد علي ماكينات الحفر في نوفمبر 2015، وبدأنا الشغل في 2016، يعني سنة أو سنة ونصف"، مُضيفًا: "30 يونيو 2018 سنعبر من الأنفاق الأربعة إلي سيناء، وهذا تحدي".
وواصل الرئيس كلمته قائلًا: "بنقول بعد ما تام إنجازه وواقع بنشوفه أوعوا تتصورا إن اللي اتعمل في الأنفاق عمل بسيط، 4 شركات مصرية نفذت الأنفاق بخبراء ومهندسين وعمال مصريين، اشترينا معدات من برة وأرجو أن نتوقف أمام هذا الكلام لأنه ليس عملًا بسيطًا"، وتساءل: "إحنا عملنا نفق الشهيد أحمد حمدي في كام سنة؟".
وأصدرت السفن المارة عبر المجري الملاحي لقناة السويس، أصواتًا لتحية الرئيس عبد الفتاح السيسي، وأثناء كلمة الرئيس زادت أصوات السفن، فداعب السيسي، الفريق مهاب مميش، رئيس هيئة قناة السويس، قائلًا له: "أنت مسلط السفن دي علينا".
وقال الرئيس السيسي في حديثه عن بئر العبد: "هنعمل مدينة جديدة تكلفتها 100 مليار جنيه تتضمن تخطيط عمراني متكامل في بئر العبد الجديدة خلال سنتين وهنعمرها"، وأشار إلي أنه يوجد 152 ألف وحدة سكنية شرق الإسماعيلية الجديدة، يما يعني إمكانية تسكين 300 أو 400 ألف مواطن، مضيفًا: "نحن جاهزين نعيش الناس هنا حيث المدارس والمستشفيات والكنائس والمساجد وكل شيء، وإحنا مش بنقول هنعمل.. لا إحنا إن شاء الله عملنا".
وطالب الرئيس، المصريين بضرورة الثقة في أنفسهم، قائلًا: "أنا مش ببيع الوهم وستتفاجأون بالمشروعات، التي سيتم افتتاحها بجهد وعمل المصريين وشبابها من مهندسين وعمال وغيرهم، إحنا مش بنجيب شركات تعمل طالما إحنا قادرين علي ذلك، أنا بطمنكم، وأقصد بقلقي علي المصريين وحدة المصريين وقلبنا علي قلب بعض وبلدنا".
وأكد الرئيس، أن سبب ما نحن فيه هو دعم المصريين لبلدهم وصبرهم وتحملهم، مُعقبًا: "لا أجاملكم في ذلك وكل ما نستحمل أكتر كل ما نطلع لقدام أكتر.. وأوعوا تفتكروا إن النجاح من غير تعب.. النجاح بتعب وتضحية وتحمل، وعلينا النظر لما أنجزناه اليوم ونقول الحمد لله إننا ماشيين كويس".
تابع: "نعمل في كافة المجالات والمحاور ونعمل بالتوازي في كل المحاور المطلوب العمل فيها.. لا تقلقوا أبدًا.. خايفين من إيه.. دا انتوا تخوفوا الدنيا كلها.. ربنا يخلي الناس كلها ويحفظكم واحنا مستعدين نضحي.. وأنا أولكم والله العظيم .. والله لا يمكن لأحد أبداً يمسك يا مصر ولا يمس ارضك طول ما احنا موجودين.. محدش يقدر يمس مصر ولا ارضها ولا شعبها بس نبقي كتلة واحدة ونثق في الله وجهدنا المخلص والآمن والشريف.. وأكررها في زمن عز فيه الشرف".
وقال الرئيس: "إننا كمصريين قادرين علي تحدي الدنيا كلها عشان إحنا مش أشرار ولا متآمرين ولا طماعين في خير أو أموال أو أرض أحد.. إحنا بس طمعانين في كرم ربنا عشان يساعدنا نبني ونعمر.. وإن شاء الله هنبني ونعمر"، وأشار إلي أنه كلف وزارة الإسكان والهيئة الهندسية بالقوات المسلحة بمشروع قومي يتضمن تخطيطاً عمرانياً متكاملاً، سيتم تنفيذه خلال عامين أو ثلاثة أعوام، معقباً: "سواء إحنا موجودين أم لا.. الشغل مش بيقف علي حد إلا علي شعب مصر".
وتابع: "إحنا بنخطط وننفذ ونضع إرادتنا والموارد المطلوبة، وأرجو أن يعي المصريون أن الدفاع عن البلد والأرض ليس بالكلام، بل بالعرق والجهد والتضحية والدم، وإحنا كمصريين ياما قدمنا تضحيات، وأطمئنكم تماما إن ربنا سبحانه وتعالي يساعد الصالحين اللي بيبنوا ويعمروا وميخربوش ولا يهدوا أو يضيعوا، وإحنا لا بنخرب ولا بندمر ولا بنضيع.. بنجري علي أهلنا وناسنا المصريين"، وقال إن سيناء أرضنا، وإن القوات المسلحة ستتعامل مع الإرهاب بعنف، ولازم بفضل الله تعالي نضع حدا للإرهاب الموجود فيها، إحنا نموت كلنا ولا إن حد يقرب من أرضنا والموضوع مش بالكلام.
أضاف: "مفيش أي تهديد خارجي تخافوا منه، وكلامي قليل مفيش تهديد خارجي تخافوا منه، وأنا مبخافش غير من حاجة واحدة، منكم إنتم يا مصريين طول ما إنتوا كده "إيد واحدة" ولا حد أبداً هيقدر علينا بفضل الله وهنتحدي الدنيا كلها".
ووجه الرئيس، الشكر للقوات المسلحة التي نفذت مشروعات أنفاق قناة السويس في الوقت المحدد، مُعربًا عن أمله في إقامة مشروعات أكبر من ذلك، متسائلًا: "معرفش الشركات هتبقي مستعدة إنها تشتغل معانا في المرحلة الرابعة للمترو اللي طولها 14 كيلو متر، ولا لأ، هل مستعدين إنهم يشتغلوا معانا ونعمل لأول مرة في مصر كل حاجتنا من الأول للآخر بشركات ومعدات مصرية، أنا بقول لهم هاخد المكن من هنا علي هناك، لكن لما بنيجي نعمل مشروعات زي كده بناخد قروض من الدول اللي بتمول المشاريع دي، لكن في الحالة دي بتكون تمويل من الدولة، لكن قدرتها مش قوية علي إنها تمول مشروعات بالحجم ده لوحدها، فانتوا محتاجين يبقي فيه تمويل بفائدة مناسبة شوية من البنوك".
تابع قائلًا: "لن تكون أسعار هذه المشروعات عادية للمستخدم زي مبتتقدم دلوقتي، أنا بكلمكم بصراحة، هتاخد 30 مليار جنيه علشان تعمل خط مترو أنفاق بس من غير معدات، بالإضافة ل13 ملياراً أخري معدات، ده مش هينفع إن إحنا نعمله بسعر التذكرة الموجود دلوقتي، ولا بضعف التذكرة، ولا ب3 أضعافها بصراحة كده"، ووجه الرئيس حديثه لمساعد رئيس الهيئة الهندسية للقوات المسلحة، اللواء أحمد فودة، بالقول: "لو كنتوا جاهزين دلوقتي يا أحمد أنا جاهز، ادرسوا الموضوع ده وتكون أنت المسؤول قدامي عنه".
وحرص الرئيس، علي تحية ابن الشهيد أحمد منسي، والتقاط صورة تذكارية معه، وذلك خلال مشاركته افتتاح كوبري الشهيد أحمد منسي، بمنطقة قناة السويس، كما قام بتقديم ابن الشهيد أحمد منسي لرفع الستار عن لوحة افتتاح كوبري الشهيد البطل أحمد منسي العائم بقناة السويس.