رسائل الرئيس للمصريين من قناة السويس.. لا تقلقوا.. نسير بخطى جيدة.. ولا نبيع الوهم وقادرون على تحدى الدنيا كلها

وجه الرئيس عبدالفتاح السيسى مجموعة من الرسائل المهمة للشعب المصرى وعن الجهود التنموية التى تقوم بها الدولة، وذلك خلال افتتاحه لعدد من المشروعات القومية الكبرى بمنطقة قناة السويس بالإسماعيلية.
وأشاد الرئيس بالجهد المبذول من هيئة قناة السويس فى إقامة عدد من المشروعات الجديدة وعلى رأسها مشروع الأنفاق الجديدة أسفل القناة.
وحول الأحداث التى شهدتها مصر خلال الأيام القليلة الماضية، قال الرئيس السيسى خلال افتتاحه عدداً من المشروعات التنموية بمدن القناة، «حدثت تطورات كتير، وحسيت إنه الناس قلقت شوية.. لا يمكن يكون فيه قلق يا مصريين احنا ماشيين بفضل الله وخطى جيدة وقلتلكم إن مش هنبيع الوهم ليكم، وهنكون مخلصين معاكم، واللى نقدر نعمله بفضل الله هانعمله واللى مانقدرش هانقول مانقدرش، احنا ماشيين كويس بالفعل».
وقال الرئيس إنه سيتم تقديم ما يتم تنفيذه وما سيتم استكماله حتى 30 يونيو وما بعدها، وهتشوفوا حجم العمل اللى عمله شعب مصر.. حاجة عظيمة وتشرف.
وأضاف: كان من المخطط تنفيذ حفر أنفاق القناة فى 12 سنة، بواقع كل نفق 4 سنوات، احنا بدأنا فى التعاقد على ماكينات الحفر فى نوفمبر 2015، وبدأنا الشغل فى 2016، يعنى سنة أو سنة ونصف تم تنفيذ المشروع وفى 30 يونيو 2018 سنعبر من الأنفاق الأربع إلى سيناء، وهذا تحدى».
وواصل الرئيس كلمته قائلا: اوعوا تتصورا إن اللى اتعمل فى الأنفاق عمل بسيط، 4 شركات مصرية نفذت الأنفاق بخبراء ومهندسين وعمال مصريين، اشترينا معدات من بره وارجو ان نتوقف أمام هذا الكلام لأنه ليس عملا بسيطًا، وتساءل: «إحنا عملنا نفق الشهيد أحمد حمدى فى كام سنة؟».
التنمية فى سيناء
وقال الرئيس عبدالفتاح السيسي، إن سيناء أرضنا، وإن القوات المسلحة ستتعامل مع الإرهاب بعنف، ولازم بفضل الله تعالى نضع حداً للإرهاب الموجود فيها، احنا نموت كلنا ولا إن حد يقرب من أرضنا والموضوع مش بالكلام.
وأضاف الرئيس خلال كلمته: «مافيش أى تهديد خارجى تخافوا منه، وكلامى قليل مافيش تهديد خارجى تخافوا منه، وانا مبخافش غير من حاجة واحدة، منكم انتم يا مصريين طول مانتوا كده «ايد واحدة» ولا حد أبدا هايقدر علينا بفضل الله وهانتحدى الدنيا كلها».
وأكد الرئيس: «كمصريين قادرين على تحدى الدنيا كلها عشان إحنا مش أشرار ولا متآمرين ولا طماعين فى خير أو أموال أو أرض أحد.. إحنا بس طمعانين فى كرم ربنا عشان يساعدنا بننبى ونعمر.. وإن شاء الله هنبنى ونعمر».
وأشار الرئيس إلى أنه كلف وزارة الإسكان والهيئة الهندسية بالقوات المسلحة بمشروع قومى يتضمن تخطيطا عمرانيا متكاملا، سيتم تنفيذه خلال عامين أو ثلاثة أعوام،، وقال: «سواء إحنا موجودين أم لا.. الشغل مش بيقف على حد إلا على شعب مصر».
وأكد الرئيس: إحنا بنخطط وننفذ ونضع إرادتنا والموارد المطلوبة، وأرجو أن يعى المصريون أن الدفاع عن البلد والأرض ليس بالكلام، بل بالعرق والجهد والتضحية والدم، وإحنا كمصريين ياما قدمنا تضحيات، وأطمئنكم تماما إن ربنا سبحانه وتعالى يساعد الصالحين اللى بينبوا ويعمروا وميخربوش ولا يهدوا أو يضيعوا، وإحنا لا بنخرب ولا بندمر ولا بنضيع.. بنجرى على أهلنا وناسنا المصريين».
منطقة بئر العبد
وقال الرئيس أنه سيتم إنشاء مدينة جديدة فى منطقة بئر العبد بسيناء، تكلفتها 100 مليار جنيه تتمضن تخطيطا عمرانيا متكاملا فى بئر العبد الجديدة خلال سنتين وهنعمرها».
وأشار إلى أنه يوجد 152 ألف وحدة سكنية شرق الإسماعيلية الجديدة، يما يعنى إمكانية تسكين 300 ل 400 ألف مواطن، مضيفا: «نحن جاهزون نعيش الناس هنا حيث المدارس والمستشفيات والكنائس والمساجد وكل شىء، واحنا مش بنقول هنعمل.. لا احنا إن شاء الله عملنا».
المشروعات الجديدة
وطالب الرئيس المصريين بضرورة الثقة فى أنفسهم، قائلا: «أنا مش ببيع الوهم وسوف تتفاجأون بالمشروعات، التى سيتم افتتاحها بجهد وعمل المصريين وشبابها من مهندسين وعمال وغيرهم.. إحنا مش بنجيب شركات تعمل طالما إحنا قادرين على ذلك.. أنا بطمنكم.. وأقصد بقلقى على المصريين وحدة المصريين وقلبنا على قلب بعض وبلدنا».
وأكد الرئيس أن سبب ما نحن فيه هو دعم المصريين لبلدهم وصبرهم وتحملهم، معقبا: «لا أجاملكم فى ذلك وكل ما نستحمل أكتر كل ما نطلع لقدام اكتر.. وأوعوا تفتكروا إن النجاح من غير تعب.. النجاح بتعب وتضحية وتحمل، وعلينا النظر لما أنجزناه اليوم ونقول الحمدالله إننا ماشيين كويس».
وأكد الرئيس أن الدولة تعمل فى كافة المجالات والمحاور ونعمل بالتوازى فى كل المحاور المطلوب العمل فيها.. لا تقلقوا أبدا.. خايفين من إيه.. دا انتوا تخوفوا الدنيا كلها.. ربنا يخلى الناس كلها ويحفظكم واحنا مستعدين نضحى.. وأنا أولكم والله العظيم.. والله لا يمكن لأحد أبدا يمسك يا مصر ولا يمس ارضك طول ما احنا موجودين.. محدش يقدر يمس مصر ولا ارضها ولا شعبها بس نبقى كتلة واحدة ونثق فى الله وجهدنا المخلص والآمن.