إسكندرية البحر والسمك واليود..

إسكندرية عروسة كل البحور.. واسمها محفور في كتاب التاريخ والخلود.. جميلة طول عمرها.. من ساعة ميلادها.. ولحد مايفني الوجود.
وإن كانوا قالوا عليها هي المارية.. وترابها الزعفران.. يكفي أن أقول.. وعلي عهدتي القول.. إسكندرية أحلي في أيام وليالي رمضان علي شطها يحلي السهر مع ضي القمر.. والكلمة والألحان وفي أرضها تلقي أهلها بتستني كل عاشق لحبها من بني الإنسان.. السهرة صباحي مع السحور في النور.. وحتي لو النور انقطع - تلقي الكل فيها وبيها فرحان.. دي إسكندرية بلدي.. صيف أو شتا بحبها بعشق وشوق مع لهفة وشوية حنان.
الصبح في إسكندرية زي الندي نادي.. الكل فيها ع الزرق يجري وينادي.. ويدعي من قلبه يارب يا هادي.. الصيادين علي السمك في الشبكة بتشد.. وهي لا عمرها بتعاند ولا تعادي.. وأوعي تيجي إسكندرية ماتروحش بحري دي أصل إسكندرية والأصل دايما يا صاحبي صنعوا أجدادي علشان أولادك وأولادي.
إسكندرية في رمضان السنادي.. غير أي عام عدي وفات علي بلادي.. رمضان جاي هذا العام في عز الصيف.. واللي كان دايما في سابق الأعوام بيهل في أيام الشتا الهادي.. وعلشان كده رمضان السنادي تلقي البشر في الصبح الكل نيام نيام.. وصيام عن الرغي والكلام المليان مع الفاضي.. وبالليل يحلي السهر والفسح علي الشاطئ وفي الميادين وفي كل ركن م الأركان إن كان مكان في الزحام.. وإن كان مكان هادي.
وآخر التقليعات والصيحات لأهل إسكندرية من الغلابة والبهوات.. هي الفطار علي الشط وخصوصا في بحري ساعة المغربية الأكل بيتي معمول عمولة بشطارة ست البنات.. والقعدة بلدي ع الرمل من غير تكلفة أو دفع تمن المشاريب بالجنيهات.. أكلة سمك بحر أو حتي أكله محشي أو شوية فول ماترح مايسري يمري الكل قام شبعان ومع دخلة الليل تكتر الضحكات مع القفشات.. أذان الفجر ينادينا .. يهدينا.. يناجينا ويشجينا من مئذنة المرسي أبي العباس.
ياسلام عليكي يا إسكندرية وإنتي بتحضني عشاقك ساعة المغربية.. بكل شوق وحنية.. ويشوفوا معاكي موج البحر لما يتهادي بشويش جنب مركبة معدية.. وإن كان بحري أصل إسكندرية.. فسيدي بشر وميامي والمندرة والمنتزه علي طول طريق الشاطئ تلقي الكراسي مرصوصة من الضهرية.. ومع دخول العصريةA تستعد الشواطئ للحظة اللي جاية.. وهي ساعة المغربية.. اللمة موجودة.. آه.. واللقمة الهنية آه.. ونسمة البحر آه.. لكن كل ده بعيدة عن لمة العيلة مع نفحات رمضان في بحري وريحة السمك واليود اللي جاية تهز الشبك وتنادي علي بهجة رمضان زمان وفي الأيام اللي جاية.
والله عليكي ياست الحسن ياعروسة.. لما تهدي محبيكي ألف بوسة وبوسة.. مع كل طلعة شمس في الصبحية.. أو كل طلة قمر في ليلة رمضانية محروسة.
الكاميرا صالت وجالت وعلي طول الطريق شافت وعاشت.. عاشت ليلة من ليالي رمضان من الصبح للمغربية وأخويا محمود عبدالعزيز مصور مكتب إسكندرية رغم تعبه من السكر والضغط وشوية الآلام الروماتيزمية.. إلا أنه وللأمانة كان سابقني لكل الشواطئ وصور كل لحظة في يوم وليلة رمضانية وشاف إسكندرية يعيشون آخر ساعة.. مع آخر لحظة قبل الصيام بشوية وآخر دعابة وضحكة ولعبة علي شط إسكندرية.. وإن كان رمضان السنادي شاف النهار نايم وصايم والليل مليان بكلام وسلام مع حواديت وأحلام بجناح عايم يمكن نشوف رمضان السنة الجاية.. لابس توب جديد.. توب.. البحر والمركب والمعدية.. وبشر بتفطر جوه البحر وسايبة الشط للصهبجية ويجعل كلامنا خفيف خفيف علي شوية البلطجية اللي احتلوا بعض شواطئ إسكندرية وقلبوها كافيهات وتكليفة المشروب بشيء وشويات وإن ما دفعتش مع البقشيش.. يبقي يومك مش ح يعدي ويضيع صيامك وصيامي.. وكفاية كده ولازم أحاسب علي كلامي.. وتحياتي ليكو وسلامي من إسكندرية في رمضان من بحري لحد ميامي.