اخبار الفن : باسم يوسف يبحث عن قناة للموسم الثانى من برنامجه

قرر الإعلامى د. باسم يوسف – مقدم برنامج "البرنامج" – الابتعاد عن الشاشة فى رمضان، حيث يلزم الموسم الثانى لبرنامجه المزيد من التحضيرات التى تحتاج لمزيد من الوقت، مؤكدا اتباع البرنامج لشكل جديد تماما عن البرامج التليفزيونية في مصر وهو استضافة جمهور حقيقى بالاستوديو.
قال يوسف، عبر تغريدة له على "تويتر" اليوم الأحد: "بالنسبة لرمضان اخترنا ان نبعد عن الساحة لأن الموضوع زحمة جدا وزيادة عن اللزوم وكمان التحضير للمسرح والجمهور عايز وقت كبير".
وعن تجربته فى قناة "أون تى فى"، قال: "تجربتي في اون تى فى كانت رائعة ماحدش تدخل فى البرنامج وسواء فضلت فيها او تركتها أحمل الكثير من الاحترام للعاملين فيها، نتمنى نروح للقناة اللى تساند البرنامج ماديا ودعائيا من غير ما تتدخل فى السياسة التحريرية له".
وروى يوسف سبب زيارته للولايات المتحدة الأمريكية وسفره لمقابلة الإعلامى الأمريكى جون ستيوارت بالإضافة إلى استضافته فى برنامجه " The daily show"، قائلاً: "موضوع البرنامج التليفزيونى بجمهور حقيقى مش كومبارس موضوع صعب وعايز فلوس كتير، والامكانيات دى مكلفة ومش موجودة فى مصر عشان كده سافرنا لجون ستيوارت عشان نتعلم ننفذها ازاي هنا، التنفيذ والتمويل وكل ده مش سهل وعايز وقت عشان كده المفاوضات طويلة وصعبة مع القنوات".
وأضاف يوسف أن سبب طول مدة المفاوضات مع القنوات المختلفة هو الظروف الاقتصادية، قائلا: "معظم القنوات متعودة على استديو وكرسيين وهات يا رغى ومش عايزة تصرف على حاجة جديدة وخصوصا في ظل الظروف الاقتصادية دى، القنوات ممكن تصرف ملايين على مسلسلات لكن برامج سياسية لأ، يمكن لو غادة عبد الرازق هى اللى بتقدمه ممكن يصرفوا".