مصطفى رياض يكشف المستور: الأهلي بالتحكيم .. والزمالك خرابة .. وأبو تريكة ناكر للجميل

اعترف مصطفى رياض نجم الترسانة الأسبق، بتمجاملة التحكيم المصري للأهلي على حساب الفرق الأخرى، وقت أن كان يلعب مع الشواكيش، كما هاجم رياض لاعب الأهلي محمد أبو تريكة.
وقال رياض في حوار أجراه الزميلين محمد عراقى وياسمين يحيى لصحيفة اليوم السابع:
ماذا عن مواجهات الترسانة والأهلى؟
فى مباراة أمام الأهلى كانت هتحسم بطل الدورى، إذا كسبنا نأخده للمرة الثانية، ولكن الحكم كان لكن زنكالون، لغى هدف لمحمود عوض لاعب الترسانة، وانتهت المباراة بالتعادل والأهلى فاز بالدورى ظلم.

هل التحكيم كان بيساند الأهلى والزمالك؟
الحكام كانوا بيتأثروا بالجمهور شوية، فالترسانة عنده جمهور لكن جمهور منازل مش بيروح ماتشات غير فى ميت عقبة، لكن برة لا.

لما أخدو مننا الكأس قبل الماتش اجتمعنا، وعبدالحميد إسماعيل، قال شدو حيلكم قلت مش هنكسب، قال طب هتلعب ليه؟ قلتله الترسانة مقارنة مع الأهلى، الأهلى معاه الصحافة والجمهور وحاجات كتير، لكن لو الترسانة كسب أو خسر مفيش مشكلة، أما الأهلى لو خسر هتبقى كارثة، فعلا كسبونا.

هل التحكيم كسب الأهلى؟
الله يرحمه على قنديل، بعدها بشهر اشتغل شهرين مدير عام للنادى كمكافأة من عبدالمحسن مرتجى.
كيف انتقل أبوتريكة للأهلى؟
كان اسمه بيتردد والناس بتيجى تتفرج عليه سواء أهلى أو زمالك، وكان هيروح الزمالك ويوقع على الانتقال إلى القلعة البيضاء، الأهلى تفاوض معه ولكن تم الاختلاف على 100 ألف جنيه، فالخطيب عرف أن الزمالك هياخدوه، فكلم أبوتريكة، وقاله تعالى، فاللاعب قاله الخلاف على 100 ألف، راح الخطيب كلم أحد أعضاء الأهلى من رجال الأعمال وقاله إن فى مفاجأة وباقى ليها 100 ألف، ورجل الأعمال دفع الشيك واتراضى وراح تريكة للقلعة الحمراء.

هل تريكة أعطى الترسانة؟؟
هو إدى الأهلى، ولكنه لم يرد الجميل للترسانة، وهذا يؤخد عليه، فى الوقت اللى احنا فى أزمة كان المفروض يقف جنب النادى، والترسانة ميقدرش يطلب من أى لاعب، أنا لما سلفت النادى فلوس رجعوها ومعاها جواب شكر، هومفكرش، رغم أن النادى خدمه وطلعه وعرفه كل حاجة، المفروض يحفز اللاعبين أو يسأل مسؤولى النادى أو دفع مبلغ مالى لدعم النادى.
كيف ترى عماد متعب فى الأهلى؟
صعبان عليا متعب، من الفراودة الممتازين فى مصر، ونصيحتى يسيب الملعب قبل ما الملعب يسيبه، عشان يسيب ذكرى طيبة.
مرتضى منصور؟
عمل حاجات كتير، الزمالك كان خرابة، لما قابلت مرتضى قلتله، عمل حاجات متعملتش قبل كده، لأنه بيحب الزمالك، وقلبه أبيض وبيحب الناس، والنادى دلوقتى ممتاز، ومنصور عمل نادى الزمالك.