سيف زاهر يكشف كواليس الزمالك فى 72 ساعة وحكاية زيزو فى جيم 6 أكتوبر وتعديل العقود ووعد فيريرا وكيميا مرتضى منصور

محمود هنداوي
كشف سيف زاهر في تصريحات تليفزيونيه ببرنامج ملعب اون عبر قناة اون تايم سبورتس كواليس تتعلق بنادي الزمالك خلال الساعات الماضية وأسرار تتعلق بعقود اللاعبين وحكاية زيزو فى جيم 6 أكتوبر بعد مباراة فلامبو وتفاصيل جلسة مرتضى منصور مع فيريرا ووعد المدير الفنى البرتغالي .
وقال سيف زاهر : هناك لاعبين فى فريق الزمالك عقودهم كان يوجد بها ثغرات من اللجان المعينة واتحلت، مضيفا إنه لا يوجد عقود ترضية في نادي الزمالك خلال الفترة الحالية
وأضاف زاهر : كان يوجد بنود في عقود بعض اللاعبين زي يبقى اعلى لاعب مصري بياخد في الفريق وهكذا، وحصل تفاهم بين الأطراف على العقود دي فى إشارة إلى عقد الزمالك مع لاعبه يوسف أوباما الذى تم توقيعه فى عهد اللواء عماد عبد العزيز .
وتابع سيف زاهر : هحكيلكوا حكاية غريبة جداً حصلت بعد ماتش الزمالك اللي فات ، احنا في چيم في مدينة 6 اكتوبر بنروحه انا ومجموعة زمايلنا كده، روحت لقيت مين هناك بعد الماتش على طول ؟ لقيت زيزو بيعمل ريكڤري في الچيم وحتى هو مشافنيش وانا مسلمتش عليه وهو ممكن يستغرب من اللي بقوله ده، اللي وصله زيزو ده مرحلة جديدة من النجومية والمسئوليه، الراجل مبقاش مستني النادي هو بيشتغل مع نفسه.
واكد سيف زاهر فى برنامج ملعب أون تايم سبورت ، أن الكيميا بين مرتضى منصور وفيريرا بقت عالية ، مشيرإلى أن مرتضى منصور عرف ان البطولات ليها خلطة معينة بتيجي بيها وفيريرا عرف ان معاه كل مقومات النجاح، هيتقال ان فيريرا جاب البطولة و هيتقال ان مجلس الإدارة هو اللي وفر الجو نكسب البطولات والخير جاء للجميع ".
وأضاف سيف زاهر ، إنه كان هناك جلسة جمعت المستشار وفيريرا وامير، مرتضى ، موضحا أن فيريرا في الجلسة حصل على الثقة وهو عارف ان الثقة فيه وأمير كان بيأكدله ده ولكن هو كان محتاج يسمع كده من مرتضى منصور نفسه، مضيفا إلى أن رئيس الزمالك أكد لفيريرا انت عملت معجزة لما كسبت الدوري والكاس الموسم الي فات ، فيريرا قاله افريقيا هي حلمي مع الزمالك وانا هعمل كل اللي عندي عشان نكسبها، مرتضى منصور قاله انا عاوزك انت واللعيبة تركزوا في الملعب وملكش دعوة بالفلوس والحجز ، الصفقات هنخلصها وفلوسها هتدفع وهنمشي الأمور،
المستشار مرتضى منصور رد عليه فى ثانيه وقاله انت صاحب القرار الأول والأخير ، وانا جبتلك كل الصفقات اللي انت عاوزها،
فيريرا ، قاله لا انت مجبتليش الصفقات اللي انا عاوزها ، انت جبتلي اكتر من اللي كنت عاوزه كمان .