سيزيف

أحمد عصام عبدالكريم
آخر ضحايا المعركة
مات من بعيد
مات م الزهق والوحدة وسؤاله العنيد
ليه هو يفضل وحده للآخر؟
ليه كل طلق الدنيا يتأخر
والدبابات متفوتش من جنبه؟
شاف النجاة والحياة ..
لعنته وذنبه
العمر ضربة حظ
متقسمة لفصول
فى فصل تبقى الحمل
وفصل تبقى الغول
ما انتاش دليل معجزة
لكنك المسئول
الجاى مش جايلك ولا اللى فات كان لك
السر فى المشكلة وارد يكون شكلك
أو طيبتك الزايدة
جواك كتير أسئلة
بلا رد ولا فايدة
الخوف يادوب مانيكان لجراحك الزايدة
إنت السبب والنتيجة
المتن والهامش
لا كنت يوم «أبو زيد»
ولا كنت «جلجامش»
يدوب عدد فى الورق
وكرسى فى الأتوبيس
وهدوم بلا ألوان
فى دولاب ملوش أوكرة
كائن محايد.. نى بالفطرة
بضحكة تشبه كوبايات النيش
وحلم أصغر من مقاس بكرة
آخر ضحايا المعركة
موصوم
ولا انتصر ولا مات شهيد زيهم
كل اللى نابه
انسحابه
وخسارته ناس حَبهم
دور البطوله اللى رسمه
راح لناس غيره
مكانش حامل رسالة
ومبانش تأثيره
حتى اما صمم وحارب ..
خانه تقديره
آخر ضحايا المعركة
ساب أرض طارحه وطار
شاف بوابات الوصول
مش آخر المشوار
سيزيف بيحلم فى بكره
ينول جزاء سنمار.