السقا: اتهنت بسبب «فيديو صلاح».. ولو مش عايزني ارموني في الزبالة

أبدى النجم أحمد السقا استيائه من سخرية رواد مواقع التواصل الاجتماعي من الفيديو الذي نشره بالإنجليزية ووجهه لإدارة نادي ليفربول لدعم النجم المصري محمد صلاح بعد تواجده لأكثر من مباراة على دكة البدلاء.
اقرأ أيضا| بسبب فيديو محمد صلاح| أحمد السقا للجمهور: أقل إهانة عقابها 3 سنين
وأضاف أحمد السقا، في تصريحاته لبرنامج "الحكاية" الذي يقدمه الإعلامي عمرو أديب: "لقيت الرياضة دخلت في الدين والسياسة، وطبعا خدتني الجلالة وعز الدين أيبك اللي جوايا طلع، عملت فيديو أدعم فيه ابننا محمد صلاح، ووجهت رسالة بالإنجليزية يمكن يكون خانني التعبير، لكن كلمة كوتش صحيحة وعندهم محمد صلاح جوا الملعب كوتش".
وتابع أحمد السقا: "اللي قولته بالإنجليزي قعد 55 دقيقة مش انا اللي مسحته، واستخدمت كلمة ميجا ستار لأن عندهم كدا وبنتقدم عندهم برا كده".
قال أحمد السقا: "أنا مش مختل عشان أخاطب مجلس إدارة نادي ليفربول، أنا مستغرب من الهجوم والإهانة هو أنا عملت إيه؟! أنا ممكن بكره الصبح أبطل تمثيل وأقطع كارنيه النقابة، لو مش عايزيني إرموني في الزبالة... أنا صفحاتى موجودة على مواقع التواصل لكن عملت (لوج أوت) من كل الحسابات، الله يسامحهم، واللى شاتمنى أنا مسامح، وحقي عند الله، بس ياريت كل واحد يراجع نفسه".
واستطرد السقا: "أنا يتعمل معايا كده ليه .. صعبت عليه نفسي 6 ساعات الواحد اتنشر عرضه، يتعمل معايا كده لي ماشي أنا مش ميجا ستار ولا حاجة، وأقل من أقل أي حد في العالم، الناس طلعت توجهلي إهانة ليه؟ .. أقل إهانة عقابها 3 سنين سجن، وقسما بالله ما هقدم بلاغات ولا هأذي حد، وأنا مسامح".
وكان الفنان أحمد السقا، أثار حالة من الجدل خلال الساعات الماضية بعد دعمه لنجم المنتخب المصري محمد صلاح، بعد أزمته الأخيرة مع نادي ليفربول.
وقال أحمد السقا بالفيديو الذي نشره عبر حسابه على انستجرام: "كابتن محمد صلاح تحياتي وسلامي ليك ولمصر، في مثل عندنا في مصر بيقول يا جبل ما يهزك ريح، ولو أنت مش عارف أنت عملت إيه خليني أفكرك، شوف أنت جبت كام بطولة ل ليفربول، شوف أنت بالنسبة للأمة العربية كلها مش لمصر بس، أنت فخر العرب فعلاً، خلي ثقتك في نفسك تزيد مش تتهز".
وأضاف: "احنا متعودين عليك تاخد الباك رايت أو الباك لفت على الخط واللي يحصلني يكسرني، ركز يا محمد يا صلاح احنا حاطين عليك أمل كبير جداً في بطولة الأمم الإفريقية وأمل كبير جدا جدا في كأس العالم، بنحبك يا محمد يا صلاح".
ووجه رسالة لإدارة فريق ليفربول الإنجليزي، من خلال فيديو عبر حسابه الرسمي على "إنستجرام"، طالبهم خلاله بمراجعة ما قدمه صلاح مع الفريق الإنجليزي خلال ال8 سنوات الماضية.
وقال أحمد السقا: "مرحبا، صباح الخير أو مساء الخير بناء على بتشوفوني منين، اسمي أحمد السقا أحد نجوم الشرق الأوسط، وأنا مصري وافتخر وامتلك نفس جنسية محمد صلاح، عاوز أفكر جمهور وإدارة نادي ليفربول باللي عمله محمد صلاح لنادي ليفربول، أرجوكم أن تقوموا بمراجعة سريعة لتعلموا ما فعله صلاح لليفربول، وضعوا في الحسبان آخر 8 سنوات أن صلاح كان لاعبا في ليفربول".
وأضاف: "كيف تعتقدون أنكم حصلتم على كل البطولات والكؤوس، من فضلكم أعيدوا مراجعة موقف محمد صلاح، محمد صلاح أيقونة ليس فقط للمصريين والعرب، وأعتقد أيضا للبريطانيين الذين سيحترمونه دائما، من فضلكم أظهروا بعض الاحترام للاعب محمد صلاح الأسطورة، واسمي هو أحمد السقا، وهذا بخصوص إدارة ليفربول ومحمد صلاح".