حفلة

كمال سنوسى
وكانت حفلة ع الضيق
معزمتش فيها غير نفسى
وكام ورقة وكام ذكرى
حتى ضحكتى اعتذرت
وقالت اجيلك فى يوم أروق
ووجه قديم كان ليا
كالعادة جاى متأخر
ويتأسف ويضحك منى وبيسخر
ويقوللى اعذرنى لطول سفرى
ولملامحى اللى شقيانة
ومفيش فرصة أخفيها.. واتعطر واتزوق
ومش مضطر تستحمل
وجودى أو غيبتى لو كان معاك يفرق
طيب نبدأ الحفلة.. بأغنية من كلام الكدب
اللى زمان كان بيتصدق
واتوزعت أزهار الحلم
اللى عمره ف يوم ما اتحقق
وجت نفسى تعاتبنى
على اللى ضاع.. وعلى اللى باع
ومن فينا ساب المركب.. فى يوم تغرق
واختلفنا كالعادة
مين كداب ومين أصدق
والحفلة اتحولت لخناق
واتبعترت ع الأرض
الذكرى والأوراق
من امتى وبينا وفاق
أكيد ح يجيى فراق.. فى لحظة يتحقق
ونفضها سيرة
ونفض دى الحفلة
ولو مرة على غفلة
جمعتنا دنيتنا
بسرعة دوَّرى وشك
وأنا أعمل إنى مش شايفك
ومين اللى خللى الطريق طريقين
معدش الأمر خلاص يفرق.