سيد عبد الحفيظ: الأهلي محتاج مدرب عنده شغف وشخصية.. ووليد صلاح الدين بيقدّم أداء محترم

أكد الكابتن سيد عبد الحفيظ، مدير الكرة السابق بالنادي الأهلي، أن الفريق في هذه المرحلة لا يحتاج فقط إلى مدرب يحمل اسما كبيرا، بل إلى شخصية تمتلك الشغف الحقيقي، والقدرة على الإدارة تحت الضغط، والتعامل مع تفاصيل الحياة اليومية داخل الأهلي، نادي البطولات والضغوط المستمرة.
وقال عبد الحفيظ، خلال ظهوره مع الإعلامي إبراهيم فايق عبر قناة MBC مصر 2: الأهلي مش محتاج مجرد اسم كبير.. محتاج مدرب عنده شغف، شخصية، قادر يشتغل وسط تحديات يومية، ويعرف يتعامل مع لاعبين كبار وطموحات أكبر.
وأضاف:"في الأهلي كل يوم تحدي، الجمهور عايز يشوف فريق بيكسب وبيقدّم شخصية، المدرب هنا مش جاي يتعلم.. جاي يشتغل ويكسب من أول يوم.
وتحدث عبد الحفيظ عن واقعة ياسر إبراهيم، بعد رفضه تسلم جائزة رجل في لقاء حرس الحدود، والتي أثارت جدلا واسعا.
وكشف عبد الحفيظ عن حواره مع اللاعب صباح يوم الحلقة قائلا: ياسر كان بيصلي معايا النهاردة وقلت له: أنت عامل قلق ليه ياض؟ ياسر راجل وجدع، واعتقد إن اللي حصل منه خانه التوفيق فيه بس، وأظن إنه أول واحد لام نفسه، لأن دي مش طبيعة ياسر إطلاقا.
وعندما سأله الإعلامي إبراهيم فايق: لو كنت موجود، قرارك كان هيبقى إيه تجاه ياسر، أجاب سيد: فيه واحد موجود دلوقتي، كابتن وليد صلاح الدين، وعامل شغله على أكمل وجه. وأنا مش ملم بكل التفاصيل عشان أقول قرار معين.. لازم تكون عارف كواليس كل حاجة الأول، وده احتراما للموقف والمسؤول اللي بيشتغل دلوقتي.
وأشاد سيد عبد الحفيظ ب الكابتن وليد صلاح الدين، مدير الكرة الحالي بالنادي الأهلي، مؤكدا أنه يتعامل بهدوء واحترافية، ويقدم أداء جيدا جدا في واحدة من أصعب الفترات التي يمر بها الفريق.
وقال: وليد بيشتغل على أكمل ما يكون.. وبيعجبني شغله جدا، بيتعامل باتزان وهدوء، وده المطلوب في منصب زي ده في الأهلي، لأن إدارة الفريق مش بس قرارات.. دي منظومة كاملة من التواصل والقيادة والانضباط."
واختتم سيد عبد الحفيظ تصريحاته بتأكيده على أن العمل داخل الأهلي يتطلب الانضباط الكامل والالتزام، وقال: في الأهلي مفيش حاجة اسمها رد فعل فردي. النادي كيان كبير، واللاعبين لازم يكون عندهم وعي بمسؤوليتهم.. لكن في نفس الوقت، مهم جدا نفهم كل موقف بتفاصيله، قبل ما نصدر أحكام.