لماذا تعد منى زكي النجمة الأهم؟ محمد سامي يكشف الأسباب

أشاد المخرج محمد سامي بموهبة ومكانة الفنانة منى زكي بعد حديث مطول جمعهما، مؤكداً أنها النجمة الأهم والموهبة الأكبر بين فنانات جيلها.
وفند "سامي" أسباب هذه المكانة التي تحتلها منى زكي عن جدارة، وكتب عبر صفحته الشخصية على فيسبوك قائلا: «ليه منى زكي ؟.. كنت بتكلم مع منى زكى بسلم عليها وقعدت أتكلم معاها شوية وأدخل من موضوع لموضوع وبعد ما قفلت سألت نفسي أكثر من سؤال.. ليه منى زكي فارقة كتير؟، ليه عندها بريق من نوع خاص، ليه هي النجمة الأهم والموهبة الأكبر».
وتابع حديثه قائلا: «ليه هي سابقة جيلها بفرق كبير جدا رغم إن جيلها قوي وفيه زميلات نجوم حقيقيين علي جميع المستويات وموهوبين وناجحين وقدموا أعمال مهمة لكن محدش وصل لأنه يبقى منى زكي.. ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم إسمها و مكانتها علي المستوى الفني أو علي مستوي النجومية والموهبة أو حب الجمهور».
وأضاف محمد سامي: «ليه منى زكي أكثر ممثلة تصدقها وتتوحد معاها ،ليه لو فكرت في ممثلة تلاقي صورة منى زكي هي أول صورة تيجي في بالك» وكشف عن أسباب هذه المكانة الخاصة لمنى زكي قائلا:«بإختصار لأن منى زكي مثقفة متعلمة راقية متطورة مش بتمثل و خلاص ولا بتظهر وخلاص ولا بتتكلم وخلاص ولا مهتمة بتفاصيل الناس الفاضية».
وتابع: «ست كلامها مرتب وأسألتها ليها معنى وهدف وأنا بتكلم معاها مابلاقيش لحظه من النقاش دخل في جدل بلا هدف أو كلام من أجل الكلام.. الست دي وهي بتتكلم عن الفن تحب تسمعها و لما توصف الفن تفرح إنك تنتمي ليه من طريقة كلامها عنه».
إقرأ ايضا: بدء تصوير «سنجل ماذر فاذر» بطولة ريهام عبد الغفور وشريف سلامة
واستكمل محمد سامي: «لما تناقش معاها أي موضوع تلاقي وعي وحكمة وتحضر وثقافة.. ست ناجحة وزوجة وأم ناجحة لما تتفرج علي أي مشهد ليها بتلاقيها خلته مش عادي بتشوف تحضير و مذاكرة ورؤية و مجهود واضح وعلام و عقل مترتب و ده بيبان في أصغر التفاصيل.. بتقدم أي مشهد صعب ببساطة و شياكة من غير تصنع او تشتيت طريقتها في النقد شيك و تبسيطها لصعوبة أدوار عملتها بيدل علي ثقتها في نفسها اللي بلا حدود».
وأشار سامي إلى أن منى زكي تنتقي ليس فقط أعمالها من أفلام ومسلسلات وإعلانات ولكنها تنتقي أيضا ظهورها وحديثها في ندواتها ولقاءاتها، قائلا: «هتلاقيها بتعرف تنتقي وهتلاقي دايما في جودة ورمز مشرف للست المصرية».
واختتم حديثه قائلا: «بجد الكلام على عظمة منى زكي صعب يخلص في بوست بس حسيت بعد ما قفلت معاها إني عايز أكتب كده من كتر ما استمتعت بالكلام معاها كالمعتاد.. يا بخت الفن المصري والعربي بنجمة النجوم منى زكي، و يابخت كل فنان وفنانه حضرها و نسب لفترة هي فيها ، يا بخت كل زمايلها اللي من جيلها إنهم من جيل منى زكي و يا بخت كل ممثلات الجيل اللي بعدها إنهم عندهم منى زكي يتعلموا منها.. ربنا يديم على الفن نعمة منى زكي ودايما ناجحة ومتفوقة وبتمتعنا بكل دور بتقدمه وكل مشهد بتأديه.. بحبك يا عظيمة ياللي حببتينا و لسه بتحبيبنا اكتر في مهنتنا»