إمام عاشور: بنتي لما شافتني بزعق عيطت وكنت عايزها تشاركني اللحظة السعيدة

تحدث إمام عاشور لاعب خط وسط الفريق الأول لكرة القدم بالنادي الأهلي، عن مشادته مع فرد الأمن في مراسم تتويج الأهلي بلقب الدوري المصري الممتاز.
وقال عاشور، خلال استضافته في برنامج الكورة مع فايق المذاع على شاشة إم بي سي مصر2، أهلي كانوا في المقصورة وبنتي كانت موجودة، وكنت عايز أجيبها، وفرد الأمن منعني اتكلمت معاهم باحترام في الأول، وقولتلهم مش عايز أنزل والدي ولا مراتي، أنا عايز بنتي بس، وقالولي مش هينفع.
وأضاف إمام عاشور، لقيت بعدها حد من اللعيبة واخد ولاده، فقولتلهم كذا واخد ولاده قالولي مش هيطلع معاه التتويج، فقولت وأنا كمان مش هطلع بنتي التتويج، وكانت اللقطة حصلت من الشناوي بردو، بس الناس صورتني أنا.
وتابع: بقوله أنت هتفضل موقفني كدة وبنتي معايا، ولما بنتي شافتني بتكلم بزعيق عيطت، وبعدين شديت البوابة، وقولتلهم إنتوا إزاي تعاملوني كده، وليه مش عايزين تدخلوا طفلة متعرفش حاجة، وكنت عايزها تشاركني اللحظة السعيدة دي.
اقرأ أيضا| إمام عاشور يكشف كواليس حصد لقب الهداف: روح الأهلي مذهلة
وأكد إمام عاشور، أن الموقف الناس خدته في سكة تانية، طب ليه ما خدتوش بالكم من بنتي اللي كانت واقفة في زنقة، وعاوز أنزلها معايا لحظة التتويج، أنا لو طلعت كل شوية أبرر تصرفات، مش هخلص ومش هعرف أركز في شغلي وبعد الماتش، اتصورت مع فرد الأمن، وأهديته التيشيرت بتاعي، واترضينا."
جدير بالذكر أن الأهلي توج ببطولة الدوري العام للمرة الثالثة على التوالي، والخامسة والأربعين في تاريخه، بعد الفوز على فاركو بستة أهداف مقابل لا شيء، في المباراة التي أقيمت على ملعب استاد القاهرة في ختام مشواره بالمسابقة.
وأحرز أهداف الأهلي وسام أبو علي أربعة أهداف «سوبر هاتريك»، وهدف لكل من حسين الشحات وإمام عاشور.
وتصدر الأهلي جدول ترتيب الدوري العام برصيد 58 نقطة بفارق نقطتين عن بيراميدز أقرب منافسيه .
اقرأ أيضا| إمام عاشور يخطب ود التوأم: احترامي وتقديري للجهاز الفني لمنتخب مصر