«إزاي يعملوا معايا كدة».. إمام عاشور يعلق على مشادته مع فرد الأمن

علق إمام عاشور، نجم النادي الأهلي، على مشادته مع فرد الأمن في مراسم تتويج الأهلي بلقب الدوري المصري الممتاز.
وحقق الأهلي بطولة الدوري المصري الممتاز، بعد الفوز على فاركو بسداسية دون رد في ليلة شهدت تألق وسام أبو علي وأحرز سوبر هاتريك، وذلك في المباراة التي جمعتهما بالجولة الأخيرة من المسابقة.
وقال خلال استضافته في برنامج الكورة مع فايق المذاع على شاشة «إم بي سي مصر»: «أهلي كانوا في المقصورة وبنتي كانت موجودة، وكنت عايز أجيبها، وفرد الأمن منعني اتكلمت معاهم باحترام في الأول، وقولتلهم مش عايز أنزل والدي ولا مراتي، انا عايز بنتي بس، وقالولي مش هينفع».
وأضاف: «لقيت بعدها حد من اللعيبة واخد ولاده، فقولتلهم كذا واخد ولاده قالولي مش هيطلع معاه التتويج، فقولت وانا كمان مش هطلع بنتي التتويج، وكانت اللقطة حصلت من الشناوي بردو، بس الناس صورتني أنا».
وتابع: «بقوله انت هتفضل موقفني كدة وبنتي معايا، وكاتليا لما شافتني بتكلم بزعيق عيطت، وبعدين شديت البوابة، وقولتلهم انتوا إزاي تعاملوني كدة، وليه مش عايزين تدخلوا طفله متعرفش حاجة، وكنت عايزها تشاركني اللحظة السعيدة دي».
واختتم: «اتكلمت بعد الاحتفال مع فرد الأمن ورضيته، واتصورنا مع بعض في أوضة اللبس، وخد التيشيرت بتاعي، ومفيش أي حاجة».