اتغيرنا أوى كده ليه؟!

مصرية أنا

من ساعة ما الكاكاو بقى هوت شوكلت.. أو شوكولا شو.. والبليلة بقت بينز... أو بليه أوليه.. والفيشار بقى پوپ كورن.. وغزل البنات كُطُن كاندى.. والملوخية بقت جرين سووپ...
كله كوم و«جرين سووپ» دى كوم لوحدها طبعا... والديك الرومى بقى تركى وداندى.. والفلافل جرين برجر.. والفول رد بينز.. والقهاوى بقت كافيه... والقهوة نفسها بقت كوفى... وعرفنا القهوة باللبن بإسبرسو ماكياتو.. والبقسماط بقى باتون ساليه... والفطير بالكاستر بقى كريب بالنوتيلا والبنانا... ولقمة القاضى بقت لوكوموديس.. والمخدرات بقت روشنة وصياعة!
من ساعة ما الراجل بقى كيوت... والبنت بقت مزززة... من ساعة ما الوطنية بقت فى خبر كان... والتدين السليم بقى تخلف... والعادات الشرقية بقت بيئة... و«السلام عليكم» بقت بلدى... من ساعة ما الخلافات بقت اون لاين... والزعل بقى بلوك...
والضحك بقى ايموشن... والتهانى بقت كلمات جافة ع الواتس آب.. وكمان بقينا نكتب عربى بحروف انجليزى من باب الروشنة... والجهل.
ومن ساعة ما البنى آدم بقى قيمته ف لبسه ونوع موبايله وعربيته مش ف أخلاقه واحترامه... من ساعة ما بقينا نحس بالوحده فى وسط اهالينا... هو احنا اتغيرنا أووووى كده ليه؟ والناس مبقتش زى زمان؟
الناس اتغيرت... ونسينا كل عاداتنا وأصالتنا وجذورنا... قطعنا أرحامنا وفقدنا إحساسنا بالمحتاج (مش شرط محتاج فلوس.. حتى اللى محتاج عطف وحنان ومجرد إحساس صادق.. مجرد إحساس بالوجود).
من ساعة ما أصبحنا نستسهل الإنجليزى ونفضله على لغتنا العربية الجميلة.. وأصبحنا بلا هوية... بلا أخلاق.. بلا انتماء..
يا ناس يا هو.. عودوا إلى جذوركم يرحمكم الله!