وفاء عامر توجه رسالة مهمة بشأن شائعات السوشيال ميديا | فيديو

شاركت الفنانة وفاء عامر جمهورها بتوجيه رسالة مهمة من خلال مقطع فيديو عبر صفحتها على موقع التواصل الاجتماعي «فيس بوك».
ونصحت وفاء عامر جمهورها بعدم القسوة، مؤكدة أهمية الحب والتراحم، وطلبت منهم مراعاة الله في أفعالهم، قائلة: "بلاش تبقوا جلادين، بلاش تبقوا قاسين، بلاش تبقى قلوبكم قاسية، حبوا بعض، خافوا على بعض، واسألوا على بعض. واعرفوا النهاردة حياة ودنيا بكره آخرة هتعملوا إيه بقى مع ربنا ياريت نساعد بعض ياريت منقفش قدام بعض ياريت منبقاش قاسين اوي على بعض أنا بكلمكوا من التصوير جه على دماغي إن أنا أقول الكلمتين دول لإن بجد شيء صعب جدًا جدًا لما نبص نلاقي الناس عمالة تأسفن تأسفن طب وبعدين الدنيا مش مستاهلة".
وأضافت وفاء عامر أن وسائل التواصل الاجتماعي من أسوأ الأمور التي اقتحمت حياتنا، بسبب سرعة تناقل الأخبار دون التحقق من صحتها أو من المصدر الذي نشرت عنه الشائعة، مُعلقة: "أول ما واحد يقولك أنا سمعت يا جماعة بطلوا حكاية أنا سمعت وقالوا وقولنا وقولنالهم وهنقول أصل فلان قالي أصل فلان سمع إيه يا جماعة في إيه لازم يبقى في برهان لازم نبقى شايفين بعينينا السوشيال ميديا دي من اسخم الحاجات اللي دخلت حياتنا إن لم تكن من أزفت لإنك بتقرا الخبر وفي شوية ناس كده طالعين زي الليمون الأصفر في كل حتة بيقولوا حاجات ممكن متكونش حصلت وحاجات بتبقى ساعات مدفوعة علشان بس يعملوا شو".
وأكدت على ضرورة التأكد من كل الأخبار التي تُكتب على وسائل التواصل الاجتماعي من المصدر الذي نشر عنها الخبر، مضيفة: "ده وصل إن أهلي بيتي بصحى من النوم بيقولولي يا حول الله يا رب فلانة الفلانية دخلت في غيبوبة وبنتها خدت فلوسها إيه ده بيحصل في بيتي أنا بيحصل عندي أنا أنا بجد حقيقي كنت اتمنى إن مطلعش بالعصبية دي اقولكوا متصدقوش أي حاجة ولا حتى أنا اكتبها على صفحتي على السوشيال ميديا".
وطالبت وفاء عامر جمهورها بعدم الانسياق وراء الشائعات وألا يصدقوا أي شيء يُكتب عبر صفحاتها على وسائل التواصل الاجتماعي، فقد يكون ذلك قد كُتب بواسطة المشرفين على الصفحة. وأضافت: "لازم تتقال في نشرة إخبارية بجد لازم تتقال بجد على قناة موثوق منها ممكن يكون عندي أدمن أنا مش شيفاه أو مخدتش بالي منه يكون له مصلحة في نشر شاءعة ما ياريت نحب بعض ونخاف على بعض، ومتصدقوش أي حاجة تتكتب على السوشيال ميديا لازم تبقوا متأكدين من صحة الخبر المتداول لازم يبقى المصدر أكيد مصدق ومجرب منأذيش بعض لمجرد إشاعة، وياريت منأذيش بعض خالص وياريت نحب بعض عشان الحب شح بقى قليل أوي".
وكانت وفاء عامر، احتفلت مؤخرًا بعيد ميلادها بتاريخ 25 مايو، حيث احتلت الساحة الفنية واستطاعت في السنوات الماضية أن تجسد الكثير من الشخصيات المختلفة ببراعة شديدة، وقدمت العديد من الأعمال المميزة مع عمالقة الفن لذلك أصبح لديها شعبية كبيرة وقبول كبير على الشاشة المصرية.
وتعاقدت وفاء عامر، مؤخرًا على المشاركة في فيلم «محو أمنية» بطولة مصطفى خاطر، وتجسد وفاء شخصية والدة أيتن عامر ضمن أحداث العمل الذي يدور في اطار اجتماعي كوميدي.
فيلم «محو أمنية» يدور في إطار اجتماعي كوميدي، يقدم خلاله مصطفى خاطر شخصية سيناريست يحلم بتحقيق النجاح بأعماله السينمائية، والعمل يشارك في بطولته وفاء عامر، أيتن عامر، محمد ثروت، محمود البزاوي، ومحمد رضوان، ومن تأليف حسام كمال وأدهم سعيد وإخراج محمد عبدالرحمن حماقي.
وحققت وفاء عامر نجاحًا كبيرًا في موسم دراما رمضان 2024 الماضي، بمشاركتها في مسلسل «حق عرب» من بطولة أحمد العوضي.