أحمد طارق: «الشخصية دي مختلفة تمامًا ياسر شخصية فرفوشة وبتحب الحياة جدًا»

قال الفنان أحمد طارق عن أسباب تقديمه لشخصية ياسر حلمي في مسلسل حالة خاصة، «أول ما الورق جالي اتبسطت جداً لاسباب كتيرة اوي السبب الاولاني القصة نفسها والموضوع اللي بيتناقش المسلسل، أنا بحب اكتر الحاجات الاجتماعية اللي بتناقش مشاكل اجتماعية».
وتابع طارق في تصريحات صحفية:"وأعتقد المسلسل بيتكلم على الحالات الخاصة والناس اللي في المجتمع بتاعنا اللي بتعاني عشان الناس التانية مش فاهمها زي مرض التوحد اللي احنا بناقشة في المسلسل اعتقد دي نقطة مهمة جدًا ولازم نسلط عليها الضوء".
واستكمل:"عشان احنا في اوقات كتير مبنعرفش نتعامل معاهم ازاي مع انهم في وجهه نظري ناس طبيعية جدًا يمكن يبقوا احسن بكتير من ناس عادية فادة اول حاجة لفتت نظري ان هو بيناقش مشكلة لازم يحصل توعية عليها توعية عامة ولازم الناس تبقى فاهمة ازاي تتعامل مع الحالات الخاصة دي".
وأردف:"نمرة اتنين حاجة ليها علاقة بالشخصية وليها علاقة بيا آنا شخصيًا ان هي شخصية مختلفة تماما عن عن كل الادوار اللي انا قمت بيها قبل كدة يعني ممكن الادوار اللي انا قمت بيها كنت دايما الصدر الحنين دايما اللي هو بقف جمب الست دايما بتفهم زي مابيقولوا".
وأضاف:" الشخصية دي بقا مختلفة تماما شخصية ياسر حلمي شخصية فرفوشة اوي بتحب الحياة جدًا بيحب نفسه اوي بيحب الستات جدًا ودي كانت اكتر نقطة محورية في القرار اللي انا خدته عشان انا اخد الشخصية دي وهو بيمثل مش عايز اقول الاغلبية رجالة كتيرة يعني او ناس كتير جدًا بتدي لنفسها الفرصة بتدي لنفسها الحق انها تعرف تخون مراتها او ان هي تعمل علاقات برا اطار الزوجية وغير كدة كمان اللي هو متجوز واحدة في المسلسل"
واستكمل:"اللي هي طبعا غادة عادل هي المرأة الحديدية هي أهم محامية في مصر شخصية قوية جدًا بس بتضعف من ناحيته بتضعف من ناحيته عشان ابنه عندة توحد فطبعا شخصية حلوة فيها ابعاد كتير فقولت لازم اجرب تجربة مختلفة".
وتابع حديثه عن تحضيراته لشخصية ياسر:" الحقيقة متعبتش اوي يعني اللي فات هما متعبين اكتر يمكن دة بيمثل ناس كتير مننا وبيمثلني انا شخصيا في وقت من الاوقات عشان ابقى صريح يعني ولكن المجهود اللي حصل من المخرج من ان اللي انا عملته برضو شوية كلاسيس عشان اخد وش الكاركتر نفسها حضرنا كويس عملت الشخصية كويس دة اللي ساعدني جامد جدا في ان انا أحاول ان انا ابرز مميزات الشخصية او هايد لايد للحاجات الي قد تكون مميزة بس محستش ان انا تعبت اوي".
أبطال مسلسل حالة خاصة
وشارك في بطولة المسلسل كلا من:طه دسوقي، غادة عادل، أحمد طارق، هاجر السراج، حسن أبوالروس، وئام مجدي، أحمد الأزعر، علي سبع، لينا إيهاب، نبيل علي ماهر، الطفل آدم وهدان، آدم النحاس، و المسلسل من تأليف مهاب طارق، وإخراج عبدالعزيز النجار، وإنتاج طارق الجناينى.