منعطف خطر

يوميات الأخبار

وازنوا مزايا الشخص وعيوبه وشوفوا انهى كفة اللى هتطُب.. عشان وقت الجد كل واحد بيشيل شيلته ومحدش بينفع حد
لو ناوى تنفصل عن شريك حياتك..
لو مش قادر تستحمل الشخص و لا تتقبل طباعه أكتر من كده؟
حاسس انك زهقت من كتر الخلافات اللى بينكم؟
من فضلك لو خطرت على بالك فكرة الطلاق.. عايزاك تهدى وتقرأ كلامى بالراحة وبعدها عيد تفكيرك فى قرارك من تاني..
لو ناوى تاخد خطوة الطلاق لازم تعرف فعلاً هل قرارك ده نابع من مشاكل فعلية غير قابلة للحل ومش قادر تتعايش معاها خلاص و الا قرار ناتج عن تراكم مشاكل عادية أو بسبب ملل الروتين اليومى أو بسبب انك مضغوط بشكل عام فى حياتك فا مش مستحمل حاجة من حد..
فى زوجة قبل كده لما قعدت أتكلم معاها اكتشفت انها عايزة تتطلق عشان زهقت، اللى بتبات فيه بتصبح فيه وجوزها شخص روتينى جداً.. معندهاش أى مشكلة حقيقية معاه ولما وصلنا لكده سوا حست قد ايه انها اندفعت فى قرارها وكانت هتهدم حياة مستقرة لمجرد انها محتاجة شوية تجديد وطرقعة وكسر للروتين من شريك حياتها!
لازم تتأكد قبل الإقدام على الطلاق أنك استنفدت كل السبل للإصلاح.. انك اتكلمت بوضوح بدل المرة ميّة مع شريك حياتك وفهمته إيه اللى ناقصك وإيه اللى انت محتاجه منه.. سمعاك ياللى بتقول «الاهتمام ما بيتطلبش» بس صدقونى ده كلام بيتقال بهدف خراب البيوت المستعجل، الاهتمام بيتطلب عادى لإن ممكن جداً تكون لغة حبك مختلفة عن لغة حب شريك حياتك، فا هو بالفعل بيحبك بس بطريقته مش بطريقتك واتكلمنا عن ده باستفاضة فى يوميات سابقة بإسم «لغات الحب الخمس»
قبل ما تتطلقوا لازم تفكروا كويس فى مميزات وعيوب شريك الحياة وتوازنوا بينهم .. ممكن جداً كفّة المميزات تطب وتحس ان الشخص ده يستاهل ياخد فرصة ومميزاته تشفعله.. بس من كتر ما اتعودت تركز على العيوب مبقتش شايف غيرها!
قبل ما تتطلقوا افتكروا ذكرياتكم سوا، مواقف جدعة لشريك حياتك، لحظات ضعف سندك فيها و قوّاك..
قبل ما تتطلقوا افتكروا العِشرة وسنين العمر اللى قضيتوها سوا وكبرتوا فيها مع بعض سوا..
قبل ما تاخد القرار..
خد وقتك وتمهّل ..
فى ناس علاقتهم بترجع تانى لما بيبعدوا عن بعض شوية لإن ده بيصفّى ذهنهم للتفكير..
وناس تانية علاقتهم بتتحسن لو سافروا سوا وقضوا كام يوم لوحدهم فى محاولة لاستعادة أيام زمان..
قبل ما تاخدوا القرار حكمّوا ناس ثقة يصلحوا بينكم..استخيروا كتير.. واطلبوا مساعدات من أخصائيين فى العلاقات الزوجية، واقروا كتب تفيدكم عن الزواج والعلاقات.. اعملوا كل حاجة وأى حاجة عشان لما تقرروا تقفلوا الصفحة وتاخدوا قرار بالانفصال تكونوا متأكدين ان مفيش حل غيره و ان استحالة هتقدروا تعيشوا مع بعض تانى بحب و احترام..
عامة أى قرار الانسان بياخده مينفعش يتاخد وقت الانفعال .. سواء انفعال ايجابى «انى سعيد بزيادة» أو انفعال سلبى «انى حزين / مجروح/ متعصب...» لأن أى انفعال زائد بيعطل التفكير المنطقى بنسبة 70-80٪، عشان كده عند الانفعال الزائد لا تقرر قرار ولا توعد بوعد.. عشان فى الحالتين هتندم على تسرعك.. لازم تدى نفسك الفرصة انك تهدى وبعد كده قرر على مهلك..
خلاص اتأكدت ان القرار مش اندفاعى ولا انفعالى ولا لحظى..
زمان قالولنا لو عايز تحكم على أى موضوع صح.. بص عليه من بره، خرّج نفسك منه و اتفرج على المشهد كله..
هستأذنك دلوقتى تطلع بره الموضوع عشان تعرف تحكم عليه صح..
تحكم عليه بنظرة محايدة..
طيب لو مش عارف تحكم برضه؟
يا تسأل متخصص يدّلك
يا شخص أمين تثق فى رجاحة عقله ومتأكد انه عايزلك الخير وبتشوف فيه حكمة ووعى..
بقولك كده ليه؟ لأن كتير مننا بيسأل الشخص الغلط ويرجع يندم بعد فوات الأوان انه لما مشى وراه غرّقه!
يعنى لو مثلاً عندك مشكلة مادية مينفعش تروح تاخد رأى شخص مديون لإنه هيغرّقك، كان نِفع نفسه من باب أولى.. فاختيار الأشخاص اللى بناخد رأيهم فى مرحلة التردد من أخطر ما يكون..
طيب لو انت لسه متردد فى قرار الطلاق بعد ده كله تعمل ايه؟ اصبر.. اصبر.. اصبر..
مفيش حد بيجرى وراك عشان تتطلق!
عارفين احنا بنتردد فى أى قرار أو خطوة فى حياتنا امتي؟
أولاً: لما بنكون مش عارفين ايه هدفنا من القرار ده..
يعنى كتير تسأل واحدة عايزة تتطلقى ليه؟ متبقاش عارفة ترد.. معندهاش رد واضح وقاطع ومقنع يستحق انها تطلب الطلاق
ثانياً: الخوف من النتائج
فى ستات نفسها تتطلق وحقها تتطلق لإنها متضررة بالفعل بس مترددة عشان معندهاش مصدر دخل ثابت تصرف بيه على نفسها.. فالحل ساعتها انها قبل ما تعلن رغبتها فى الطلاق تدّور على شغل وتستقر فيه وتأمن دخلها وتقف على رجلها وبعدها هتبقى مستعدة بدون تردد انها تتطلق..
فى نقطة مهمة لازم نحطها فى بالنا «مش كل قرار صح قابل للتنفيذ لحظياً» ..
طبيعى يكون فى فترة زمنية بين القرار وتنفيذ القرار
لو انت قررت تهاجر هتاخد سنين عقبال ما تعادل شهادتك وتمتحن وتقدم على طلب هجرة ويتقبل وهكذا..
فى متزوجين كتير أول ما فكرة الطلاق تتطرح بينهم، تتفاجأ بشخصين اتحولوا لوحوش كاسرة! كل لغتهم «أنا هربيه.. و أنا هفرجها.. انه هلففه حولين نفسه.. تبقى تقابلنى لو طالت منى هى وعيالها مليم أحمر».
فحتى لو كان فى مجال لحل الخلافات بينهم فاللى قالوه لبعض واللى عملوه فى بعض مش هيتنسى .. عشان كده ربنا سبحانه وتعالى أمرنا «ولا تنسوا الفضل بينكم».
الناس لما بتختلف برقى بيبقى فى مجال للإصلاح وخط للرجعة..
فى كتير بيتطلقوا عشان وقت الخلاف اكتشفوا معادن بعض وتربية بعض.. اكتشفوا وجه آخر مُرعب لا يُعاشر..
وقت الاختلاف هو وقت اختبار المعادن..
وغالباً فى الوقت ده بيغلب على ناس كتير الكِبر..
بيفكر فى نفسه ومنظره وبس.. حتى ممكن يدوس على ولاده ولا كإنه يعرفهم، بينتقم من شريك حياته اللى عايز ينفصل عنه بالأولاد!
متابعة حكتلى انها كانت فى خطواتها الأخيرة فى الطلاق ولكن تراجعوا على آخر لحظة بعد ما جوزها هددها انه هياخد منها العيال بالقوة وهى هددته انها هتعمل فيه محضر عدم تعدّى!
قالتلى رجعنا و انا خايفة منه وهو مش طايقني..
إحنا الاتنين حاسين بالغدر ومستنينه من بعض فى أى لحظة مع انهم ظاهرياً يبانوا كويسين بس خلاص اللى اتكسر بينهم استحالة يتصلح..
ارجوكم خراب البيوت مش سهل..
سيبكم من دعوات السوشيال ميديا المنتشرة ان الناس تبيع بالرخيص وتبيع بالساهل..
و ان الاهتمام ما بيتطلبش.. واللى باعنا خسر دلعنا ..
ساعات الشخص اللى بيكون فاكر نفسه ملاك بجناحات بيكون هو نفسه الشخص اللى لا يُطاق ولا يُعاشر بس هو واهم نفسه انه فُلة شمعة منورة والعِيبة ما بتطلعش منه..
ارجوكم افتكروا لبعض الحلو.. تغافلوا عن الوحش لأن كلنا فينا عيوب.. خدوا وقتكم فى القرارات المصيرية لأن الطلاق مش هيأثر عليك انت وشريك حياتك وبس، ده هيأثر على عيلة بحالها.. حطوا ولادكم فى الحُسبان .. وازنوا مزايا الشخص وعيوبه وشوفوا انهى كفة اللى هتطُب.. عشان وقت الجد كل واحد بيشيل شيلته ومحدش بينفع حد.