أحمد فهمي: السفاح الحقيقي عنده ثبات انفعالي مش طبيعي

كشف الفنان أحمد فهمي، تفاصيل تجربته في مسلسل سفاح الجيزة، الذي يُعرض حاليًا على منصة شاهد الإلكترونية وحقق نجاح كبير منذ عرض أولى حلقاته.
وقال أحمد فهمي في لقائه مع الإعلامي شريف عامر، في برنامجه يحدث في مصر، المذاع عبر شاشة قناة MBC مصر، عن خوضه تجربة مسلسل سفاح الجيزة: كان في مخي من زمان حتى من أيام ما كنت مع هشام وشيكو إني لازم أكسر النمط وأنا بحب أنواع البطل اللي مش مثالي اللي بيصحش مبيبوسش إيد أمه، وأنا كنت قولت للمنتج إني عايز النوع ده ولاقيته إداني سكريبت سفاح الجيزة، ووافقت عليه على طول.
وتابع أحمد فهمي: قعدنا نشتغل سنتين تقريبًا لأن العمل كان صعب، والمخرج هادي الباجوري وجهني في حاجات كتير ومنها تون الصوت والابتسامة.
وأضاف أحمد فهمي، أنه لم يُشاهد أي من المشاهد التي تم تصويرها في اللوكيشن، وأنه يتابع العمل مثل الجمهور، قائلًا: أنا عندي مبدأ أن طالما معايا مخرج كبير زي هادي الباجوري، مش صح إني اتفرج على المشاهد اللي صورتها، لأن لو عجبني أدائي مش هعمل باقي المشاهد حلوة، وكل حاجة في العمل مسؤولية المخرج، ودي شغلانة صعبة جدًا أن الواحد يكون مخرج.
أما عن تفاصيل حفاظه على تعابير وجهه خلال أحداث العمل، فعلق أحمد فهمي قائلًا: إني أحافظ على الثبات والتون متعب جدًا، وأنا اتفرجت على الفيديوهات بتاعة الشخصية الحقيقية، أنا مبعملش السادات ولكن لازم أخد منه، ولاقيته عنده ثبات انفعالي مش طبيعي وتعابيره مبتتغيرش في التحقيقات.
واستكمل: خرجنا برا الصندوق ومعتمدناش أسامي تشيل البيع، وهادي الباجوري كان مركز وكنت بتفاجئ بناس في المسلسل ومكنتش أعرف أنهم اللي هيعملوا الأدوار.
وأضاف أحمد فهمي، أن تركيزه في العمل والبعد عن السوشيال ميديا أثمر عن مشاريع ناجحة، قائلًا: أنا مش متابع أي حاجة ومستمتع بالتجربة ومش عايز أدخل في كومنتات وأقرأ وبُعدي عن السوشيال ميديا السنتين اللي فاتوا طلعني بمشروعين كبار ومش هقول أن حاجتي أحسن حاجة ولكن الحمد لله، انا معنديش مثل أعلى وبشوف التجارب اللي قبلي وبحللها زي أستاذ عادي إمام لما غير في جلده عاش كتير
واختتم قائلًا: لما انفصلت عن هشام وشيكو الناس قالت هيعمل إيه بقى؟، ولكن الحمد لله نجحت والشغلانة فيها ريسك أن الناس ممكن تحبك مرة ومتحبكش مرة تانية.