رجلى على رجلك يا سى السيد !

احم احم !

أنا عايز صبية يكون قوليبها عليا ترسملى على الطاقية قلب ويمامة ودار!
إيه المزاج العالى ده يا سى السيد، اللهم اجعله خير؟
احم احم هو انتى واقفة ورايا من امتى يا وليه انتى؟
متخدش فى بالك يا خويا أنا هنا من ساعة ما كنت بتدورعلى صبية يكون قوليبها عليك!
جرى إيه يا أمينة هو كمان حتى الغنا عايزة تحرميه عليا مش كفاية اللى عملاه فينا الأسعار!
لا سمح الله غنى وانبسط على كيفك، الشهادة لله سى محرم فؤاد بذات نفسه مكنش بيعرف يقول الغنوة دى بالحلاوة دى الظاهر قعدتك الكتيرة مع جليلة وزبيدة علمتك تغنى.
طب بطلى كلامك الماسخ ده وقوليلى عايزة إيه؟!
أبدا يا خويا كنت بس حابة أعرف عايز تاكل إيه النهاردة على الغدا!
وحشنى الرز المعمر من ايدك يا أمينة!
ومين سمعك يا سى السيد كلنا وحشنا الرز وحياتك بس ياريت تتواضع شوية!
طيب يا سلام على شوية كوارع من ايديكى الحلوين دول!
يا راجل بقولك تواضع تقولى كوارع؟ اقولك انا ممكن اعملك كوارع بس مش كوارع عجل ولا مؤاخذة يا سى السيد
اومال كوارع إيه يعنى؟
كوارع فراخ يا سى السيد؟
انا متربى فى الحسين والسيدة وتحت الربع وعمرى ما سمعت عن كوارع الفراخ دى، هى الفراخ لها كوارع أصلاً؟
ايوه طبعا هو انت متعرفش اننا ممكن نطبخ رجول الفراخ؟ حلوة ورخيصة وكمان كلها فوايد يا سى السيد، يعنى كلها طبختين تلاتة وتقدر تتجوز عروسة جديدة تعيش معاها فى تبات ونبات وتخلف صبيان وبنات!
كلام إيه ده يا أمينة؟
وحياتك زى مبؤلك كده يا سى السيد ده المعهد القومى للتغذية بذات نفسه بيقول إن الرجل الواحدة من الفرخة بتعمل ييجى اكتر من 100 سعر حرارى، إلا يطلع إيه السعر ده يا سى السيد؟
السعر الحرارى ده معناه الحاجة اللى بتدى الإنسان قوة، وبعدين يعنى تفتكرى واحد زيى هياكل كام رجل عشان يشبع؟!
هديلك رجلى على رجلك أهم يبقوا اتنين كفاية عليك لحسن السعرات تزيد وتتسعر يا سى السيد.
يا أمينة الملافظ سعد وبعدين السعرات الحرارية ملهاش دعوة بالسعار بتاع الكلاب
طب ايش قولك بقى المعهد بيقول إن رجول الفراخ كمان مليانة كوكايين اللى بيجدد خلايا البشرة ويأخر الشيخوخة ويحافظ على غضاريفك يا سى السيد!
ههههههه الله يحظك يا أمينة أكيد قصدك الكولاجين.
انا سمعتها كده وحياتك لا وكمان بيقولك رجول الفراخ مليانة بروتينات وابصر إيه فيتامينات وبتربى عضلات!
هو انا لسه هربى عضلات يا أمينة ليه هو أنا هلعب فى كاس العالم مثلا؟
وهو يعنى سى ميسى أحسن منك مثلا وبعدين انت مشوفتش صورة كريستيانو وهو بياكل رجول الفراخ؟
طب بمناسبة ميسى وكريستيانو وكأس العالم فكرتينى يا أمينة عايز اوصيكى وصية مهمة انتى والعيال!
أحب على يدك يا سى ما تجيب سيرة الموت.!
الوصية ملهاش دعوة بالموت أنا بس عايزك لما تلاحظى إنى بدأت أنام على روحى فى أى وقت وفى أى مكان ولا بدأت اتلخبط فى أسماء العيال أو أقول كلام مش مفهوم يبقى لازم تراقبونى كويس لأن ده معناه ان ماتش العمر انتهى خلاص ومش ناقص غير الحكم يصفر!
لو على كده يا سى السيد يبقى عندى لك خبر مش حلو!!
خير كفى الله الشر؟ انطقى لجيب أجلك!
كده انت متأخذنيش بتلعب فى الوقت الضايع اديلك عشرة خمستاشر سنة يا خويا!