كاملة أبو ذكري عن مشاكل الرجل: ممكن يكون مظلوم زي الست بس بشكل تاني

بدأت منذ قليل، ندوة المخرجة كاملة أبو ذكري ضمن فعاليات مهرجان القاهرة السينمائي الدولي ال44، برئاسة الفنان حسين فهمي، والمقام بدار الأوبرا المصرية.
وتحدث كاملة أبو ذكري عن مشاكل الرجل: "الراجل عنده مشاكل كتير جدًا والست لما تكون متهانة في مجتمع ده معناه أن الراجل هو كمان متهان والمشكلة بتبقي ف المجتمع أكثر بس المرأة بتبقي ظاهره جدًا."
وأضافت "وبتمني أني أعمل حاجات كتير خاصة بالرجالة أكثر مثل العيشة والحياة نفسها والرجل الي عايز يبقي عايز يعيش حر وزي ما في كتمه نفس علي الست في كتمه نفس علي الراجل هو كما محتاج حرية بس بشكل تاني".
تابعت قائلة: أتمني أكلم الراجل المقهور مش الست المقهورة والراجل ممكن يكون مظلوم زي الست بس بشكل تاني وحاجات تاني مش واضحة غير الحاجات الي بنتكلم بيها عن الستات" .
وقالت المخرجة كاملة أبو ذكري عن المخرج الراحل أسامه فوزي: بمناسبة فيلم بحب السينما كلنا بنحبة وأسامة من أكثر الناس التي أثرت فيا وعلمني حاجات كتير وعرفني علي كتب وأفلام ومبادي وحياة عايشة معايا لحد دلوقتي" .
ووجهت كاملة أبو ذكري نصيحة للشباب الطموحين الذين يريدون أن يصبحون مخرجين ناجحين وقالت: "الدراسة ومشاهدة أفلام العالم كله وهذا شيء مهم جدا والعالم ملئ بأفلام كثيرة بالإضافة الى الشغل".
وأضافت كاملة، "أنا اشتغلت سنين كمساعدة من تدريب لا سكربت لمساعد تاني لمساعد أول، ولازم يكون الشخص بيعمل أفلام قصيرة وتخرج حاجه نفسك فيها وحاببها وحاسس بيها".
وقالت إلهام شاهين لكاملة أبو ذكرى:"أشكرك علي جمالك وتعبتك ومهنيتك وإبداعك، والميزة في كاملة أنها النموذج المبدع الذي له إضافة في كل شوت وكل جملة" .
كما وتابعت "وأنا بفرح جدا لما بشتغل معاها وبسلملها نفسي وانا بمثل وهي من أكثر الناس الي بتحب الممثيلن بجد، لأن هناك مخرجين كتير بيغيروا من الممثلين بس كاملة بتحب تعلم الممثلين وتضيف ليهم وكل الممثلين بيطلعوا معاها حاجه ومع باقي المخرجين حاجه تاني وبتشوف الممثل أهم حاجه " .
كما وأضافت إلهام شاهين :"وبنشكرك إنك بترفعي اسم مصر عالي بسبب جوائر أعمالك بالوطن العربي الي رفعت اسم مصر فوق أكثر وشرفتينا".
ويدير الندوة النقاد طارق الشناوي بحضور عدد من الفنانين والصحفيين، بمسرح النافورة.
الجدير بالذكر أن كاملة أبو ذكري، مخرجة مصرية لها العديد من الأفلام السينمائية البارزة من بينها "ملك وكتابة" و"عن العشق والهوى" (2006)، "واحد صفر» (2009)، وشاركت مع عدد من المخرجين في فيلم "18 يوم" (2011)، و"يوم للستات" (2016) الذي افتتح الدورة 38 لمهرجان القاهرة السينمائي الدولي.
عملت كاملة أبو ذكري لسنوات قبل ذلك كمساعدة مخرج في عدة أعمال سينمائية للمخرج نادر جلال من بينها "131 أشغال" الذي قام ببطولته الفنان الكبير الراحل نور الشريف، "هاللو أمريكا" للفنان عادل إمام، و"بلية ودماغه العالية" لمحمد هنيدي.
عملت كمساعد مخرج أيضًا في عدة أعمال أخرى أبرزها "البحر بيضحك ليه" لمحمد كامل القليوبي (1995) و"الساحر" لرضوان الكاشف.
لها في مجال المسلسلات التلفزيونية مجموعة من أبرز الأعمال في السنوات الأخيرة، والتي كانت قد بدأتها عام 2004 من خلال سيت كوم "6 ميدان التحرير"، تلاه بعد ذلك عملين شهيرين للفنانة نيللي كريم هما "ذات" عام 2014 و"سجن النسا" عام 2014 ومن ثم "واحة الغروب" 2017.
جددت كاملة أبو ذكري، تعاونها مع نيللي كريم، التي منحها المهرجان في وقت سابق جائزة فاتن حمامة للتميز، عام 2020 من خلال مسلسل "ب100 وش" الذي حقق نجاحًا كبيرًا.