لم أوافق.. حلمي عبدالباقي يفجر مفاجآت بشأن عودة «شاكوش» لنقابة الموسيقيين

كشف الفنان حلمي عبدالباقي عضو نقابة المهن الموسيقية، تفاصيل عودة مؤدي المهرجانات حسن شاكوش إلى النقابة مرة آخرى، مشيرا إلى أنه لم يعلم بقرار عودته إلا من خلال السوشيال ميديا فقط، موضحا أن مجلس النقابة لم يناقش عودة شاكوش خلال الفترة الماضية، حيث تقدم بالتماس فقط، وتلك كانت أحدث معلومات المجلس.
وقال «عبدالباقي» في بث مباشر عبر «فيسبوك»: «أنا اللي اختارت لجنة الخدمات بنقابة المهن الموسيقية وراضي تماما باللي أنجزته خلال فترة عملي باللجنة، وبكل الأمانة كنت بخدم الناس كلهم، الكبير قبل الصغير والمعاش قبل العامل».
وأضاف: «أكثر من مرة فكرت اني أتقدم باستقالتي، ولكن كل اللي خلاني أرجع في كلامي، إنني كنت بفكر اللي بعدي مش هيعرف يشتغل نص الشغل اللي بعمله في النقابة ومش ببالغ نهائي»، مردفا: «هتكلم في الموضوع اللى قالب الدنيا والسوشيال ميديا وهو حسن شاكوش، في اجتماع المجلس اتقدم التماس من شاكوش بواسطة لجنة التحقيقات عشان ياخد العفو وكفاية 10 أشهر».
وتابع: «تناقشنا في المجلس وقولنا مش هنعطي قرار في الموضوع ده تماما، وده معظمنا وقولنا مش هنتناقش غير في انعقاد المجلس القادم، وتاني بحلف على المصحف، قيل لي إن في بيان مكتوب من الشؤون القانونية إن مفيش حرمان مدى الحياة ولو سمحت امضوا على كدا، وقالوا إن أنت مش هتمضي غير إن مفيش حد هيحرم مدى الحياة، وليس عودة حسن شاكوش، ومضينا أنا والمجلس على ذلك الأساس، وهو قرار عن عدم حرمان أحد مدى الحياة».
واستطرد: «لو أنا بقول كلام كدب يطلع اللي قالي كده يقول إني كداب، قولنا يا جماعة لو الموضوع يخص شاكوش لازم نرجع، ونعقد مجلس عشان نتكلم في رجوع الشخص ده، وأنا عارف إن البيان ده عشان أزمة شاكوش، أما يا جماعة هنعمل مجلس قبل رجوع شاكوش».
وتابع: «وكل حرف بقوله أنا مسؤول عنه وانا عارف اني ممكن يحصلي مشكلة ولكن كل الكلام ده لا يعنيني ومستعد حالا أقدم استقالتي وده لن ينقص مني شي، وانا بقول الحقيقة واللي عنده عكس كدا يخرج يقول اني كداب».
وأوضح: «بعد كدا من كام يوم كنت موجود في النقابة وبعض أعضاء المجلس وبعدين خلص ميعادنا وروحت، في البيت لقيت الأخ حسن شاكوش طالع بصورة من النقابة وبيقول أخذت الكارنيه، مين اللي اعطاله الكارنية من غير المجلس ولا اجتماع أنا معرفش، واقسم بالله وحياة المصحف إن كلامي ده بالكلمة».
واختتم: «أنا مش ضد أي حد لكن كان لازم يكون في شكل قانوني للموضوع ولازم تترد الإهانة لإخوتنا الموسيقيين، وكل الكلام ده على الملأ ومصر كلها تشوف، وكلامي ده مش عايز اقطع عيش حد، ولكن الناس اللي اتهانت دي لازم تتراضى ويكونوا موافقين من قلبهم، وده اللي كنت عامل حسابه وده بكل اختصار اللي حصل».
وكان المطرب الشعبي حسن شاكوش حصل تصريح الغناء من نقابة المهن الموسيقية.
ونشر «شاكوش» صورة تجمعه بمديري أعماله من داخل النقابة عبر «فيس بوك»، الأحد، قائلًا: «الحمد لله استلمت كارنيه النقابة جاهزين للشغل»، مشيرًا إلى أنه يستعد للعمل داخل مصر بعد حصوله على تصريح الغناء.
كانت نقابة المهن الموسيقية، ناقشت عودة مطرب المهرجانات حسن شاكوش، وذلك بعد وقفه خلال الأشهر الماضية بسبب أزمته مع المطرب الشعبى رضا البحراوي وعازفي الإيقاع في الساحل الشمالي، حيث قدم «شاكوش» التماسا لحصوله مرة أخرى على تصريح غناء بعد قرار إيقافه.
وأكد مصدر مسؤول بالنقابة الأربعاء، أن مجلس النقابة اتخذ قرارًا بعودة حسن شاكوش بعد مرور عدة أشهر على وقفه نهائيًا، حيث لم يعلن القرار حتى الآن بسبب عدم استكمال «شاكوش» الأوراق المطلوبة للالتحاق بالنقابة وهي «شهادة محو الأمية»، مشيرًا إلى أن النقابة تنتظر استكمال مستندات الالتحاق بالنقابة للإعلان عن قرار عودته.
اقرأ أيضاً:- 2.5 مليون مشاهدة بعد 24 ساعة| محمد رمضان يتصدر مشاهدات يوتيوب ب«تنطيط»