مايان السيد تكشف كواليس دورها في حكاية «حلم حياتي» وأمنيتها المنتظرة

كشفت مايان السيد، عن كواليس دورها في حكاية "حلم حياتي" من مسلسل "إلا أنا"، الذي يعرض حاليا على "Dmc"، وذلك خلال مداخلة هاتفية لبرنامج "السفيرة عزيزة".
وقالت "مايان": "قبل ما ييجي لي الدور، كنت سمعت عن مسلسل (the good doctor)، بس ماتفرجتش عليه، وسمعت عن التوحد، بس ماكنتش عارفة تفاصيل، ولا عارفة ليه السلوك ده".
وأضافت: "أنا جالي الدور من سنة، وأنا بحب مسلسل إلا أنا، وكل الحكايات بتاعته، فاتحمست جدا، وقالوا لي هتكون الحكاية عن بنت عندها توحد، وأنا بحب أعمل الحاجات الصعبة اللي فيها مخاطرة وتحدي، علشان بتطلع مني حاجة أنا ماعرفهاش".
اقرأ أيضا| «توحد» مايان السيد في «حلم حياتي» يلفت الانظار: اعشق التمثيل
وتابعت: "قبل ما نبدأ تصوير بأسبوع قابلت أستاذة ياسمين المخرجة، ودي أول مرة أتعامل معاها، وكان فيه بينا تواصل وكنت حاسة إحساس مختلف، وكانت فاهماني، وقالت لي ما تقلقيش وأي حاجة حابة تعرفيها أنا هقولها لك، وهنقابل بنت اسمها ميريام علاء، عندها توحد".
واستكملت: "ميريام بنت ذكية جدًا، ولذيذة أوي، عندها مواهب كتير، بتحب التمثيل، وبتغني، وصوتها رائع، كمان بتقلد المطربين اللي بتحبهم، عندها صعوبة في التواصل البصري، وقريبة جدًا من أهلها، اجتماعية جدًا، أول ما شافتني حضنتني وبقت تتكلم معايا، ساعات مش بتفهم حاجات، بس مامتها بتفهمها، نفس تفاصيل خديجة بالظبط".
وتطرقت مايان للحديث عن التنمر حيث قالت: "التنمر مش لحد بس عنده توحد أو اضطراب، لكنه بيحصل لكل الناس، أنا كمان تعرضت للتنمر في المدرسة وأنا صغيرة لمجرد إني كنت طفلة هادية، ودي حاجة منتشرة جدا".
واختتمت "مايان" كلامها برسالة، قائلة: "عايزة أشكر المخرجة ياسمين أحمد، على مجهودها معايا وقلبها على المشروع أوي وبجد كانت عايزة توصله للناس بإحساس وتفاصيل، وعندي حلم إني أقابل الرئيس السيسي".