محمد فوزى «أبو لاسة وطاقية وطبلة وجلابية» ينافس المسحراتية

إعداد : عاطف النمر
«اصحى يا نايم وحد الدايم» جملة مصحوبة بدقات طبلة بدائية اعتاد المصريون على سماعها وقت السحور فى شهر رمضان، ومن اقدم الذين تقمصوا شخصية المسحراتى وارتدى « اللاسة والطاقية والجلابية » وأمسك بالطبلة ودلف إلى شوارع نجوم السينما والفن، الفنان خفيف الدم محمد فوزى الذى كتب له الشاعر الغنائى عبدالعزيز سلام ابيات غنائية يوقظ بها زملاءه واصدقاءه النجوم من نومهم لتناول السحور، ويبدأ رحلته الليلية بالمقطع الذى يقول فيه : " يا عباد الله وحدوا الله..أدى وقت الاستغفار.. والطلب من الله.. يا أهل الفن ويا أهل السينما.. يا أهل المزيكة والمغنى.. رمضان جه وده شهر كريم.. والصوم فيه بيودى الجنة.. يا عباد الله وحدوا الله ".
- يتجه محمد فوزى مباشرة ليبدأ جولته من بيت محمد عبد الوهاب مناديا : " يا موسيقار الجيل يا حمادة.. يا محمد عبدالوهاب.. الصوم ده يا حبيبى عباده.. والزكا فيه ميت الف صواب.. زكى بغنوة جميلة وحلوة.. نسمعها تخلينا فى نشوة.. غنى بكل حنان.. للشاكى والمظلوم.. الصبر والايمان.. دول جنة المحروم ".
وينتقل من بيت محمد عبد الوهاب إلى فيلا أم كلثوم مناديا : " أصحى يا ثومه اصحى يا غالية.. واتسحرى سحور العافية.. ياللى فى صوتك ألف كمنجة.. بترقص فى قلوبنا البهجة.. صوتك جميل يسحر قلوب البشر.. وإن قلتى اه م الآه يدوب الحجر..سمعت صوتا هاتفا فى السحر.. نادى من الغيب غفاة البشر.. ويا عباد الله وحدوا الله ".
- ويصل لبيت فريد الأطرش مناديا : " ياللى انت صوتك فريد وانت فريد عصرك.. سهران لحد السحور فى وسط اصحابك.. حيران وموش لاقى بين الناس " حبيب عمرك ".. بص فى عينهم تلاقى الكل أحبابك.. وليه بتقول بقلب حزين.. بتبكى يا عين على الغايبين ".
- ثم ينتقل إلى بيت سيدة الشاشة فاتن حمامة مناديا: " تونة يا فتونه يا حلوة يا فاتن.. الدنيا مفتونه.. وبيكى بتآمن.. صومى فى " نهر الحب "..واسحرى " بلا انام ".. سافر حبيب القلب.. و" القلب له أحكام ".. يا عباد الله وحدوا الله "
- ويدق على طبله امام منزل عبد الحليم حافظ مناديا : " يا عندليب يا اسمر..ياللى مالكش نظير.. قوم صلى واتسحر.. يزيد عليك الخير.. صوتك يرد الروح.. وينبه الوجدان.. والطير وسط الدوح.. سمعك بقى نشوان.. يقول معاك يا حليم.. الليل طلع له نهار.. لما تقول يا حليم.. " نار يا حبيبى نار".. يا عباد الله وحدوا الله "
- ومن بيت حليم إلى بيت الفنانة ماجدة يقف مناديا : " عذراء الشاشة الامورة.. السمرة الحلوة السمورة.. دى "مراهقة" وضحكتها جميلة.. والنظرة بنفطر "نوره".. قطة ولطيفة ومجتهدة.. والمجد مسميها " ماجدة "..قومى يا مجده اتشمرى.. وبمشحى ضلمه اتسحرى.. يا عباد الله وحدوا الله "
- ويصل إلى بيت صباح يقف مناديا : " بعد السحور يا صباح.... نورك علينا بان.. وصوتك الصداح.. بيكسف الكروان.. لو يسمعو الشاكى.. يفطر بقيت رمضان.. ويغنى وياكى " الحلو ليه تقلان ".. يا عباد الله وحدوا الله "
- ومن بيت صباح إلى بيت نادية لطفى يقف مناديا : " بولا.. يا نادية يا لطفى يا حلوة..ياللى جمالك اجمل غنوة.. نجمك صاعد فوق فى العالى.. والسينما بغيرك ايه تسوى؟.. خفة دم وذوق وجمال.. رقة قلب وسحر حلال.. قومى يا نادية المدفع قال.. اتسحرى وافطرى فى الحال.. ويا عباد الله وحدوا الله ".
- ويصل فى جولته إلى بيت محرم فؤاد مناديا : " شفت.. محرم.. فى رمضان..غنى وقال احلى الانغام..واد فنان فيه رقه وطيبة.. وابن حلال خالص يا سلام.. صوته جميل دايما يطربنى.. ويخلينى اقول الله.. حتى فى تمثيله بيعجبنى.. يا سلام لما يقول فى غناه.. بعد ما يفطر أو يتسحر.. " يا حبيبى قوللى اخرة جرحى ايه.. قلبى مجروح من زمان واحترت فيه.. ويا عباد الله وحدوا الله ".
- ومن بيت محرم إلى بيت سعاد حسنى يقف مناديا : " قومى يا كتكوته يا شاطره.. واتسحرى ياالله معانا.. ولو انى انا عارفك فاطرة.. وعامله صايمه ويانا..دمك خفيف ويبشرنى.. وصحتك زى الشربات.. والنظرة منك تسحرنى..وانا تضطرنى النظرات..واسرح وعقلى يحيرنى.. ويقوللى فى كل الاوقات..دى تحفه والا سعاد حسنى.. ولا القمر بان له امارات.. يا عباد الله وحدوا الله "
- وينادى امام بيت مريم فخر الدين: " قالوا الصيام ده شرع الدين.. والجنة دايما للصايمين.. هاتوا الخشاف والقمر الدين.. واتسحروا وصوموا يا فاطرين.. وانتى يا حلوة يا نور العين.. ياست مريم فخر الدين..قومى سحورك متحضر..ع السفرة يا بدر منور.. ويا عباد الله وحدوا الله ".
- ويواصل جولته حتى يصل إلى بيت هند رستم مناديا : " هند.. ولكن مش هنديه.. مغريه.. ولا مش لعبيه.. فى السينما بتعرفى مفاتنها.. وفى بيتها اخلاقها قوية.. قلبها ابيض زى جمالها.. وتملى تحب ما تكرهشي.. عاقلة صحيح وبتمشى فى حالها.. وتصوم دايما ولا تفطرشي.. وانا عايز اقولها دلوقتي.. قومى يا هند اتسحرى ياختي.. يا عباد الله وحدوا الله ".
- ويختتم جولته امام بيت تحية كاريوكا مناديا : " الرقه دى وارد امريكا.. والخفة دى وارد وادى النيل..والاسم تحية كاريوكا.. والكم مالوش فى الدنيا مثيل..يا خرابى لما بتتبسم.. توحه يا توحه اياحه.. وكمان توحه اياحه..يا عباد الله وحدوا الله ".
مجلة «أهل الفن» - مايو 1955