حياة كريمة لكل شعب مصر

شد وجذب

مش هقول ان الدنيا وردية ولا ان احنا ما بيطلعش عنينا علشان لقمة العيش.. ومش هقول كمان ان كل شئ تمام وان المحسوبية والاكراميات انتهت.. انا عارف زى كتير من المصريين ان الناس لسه بتشتكى من قلة الدخل وان اصحاب المعاشات حالتهم تصعب على اى حد.. بس عاوز اقول ان احنا كمان بقينا فى بلد شايفه كل حاجة ومش بتطنش ولا بتدى مسكنات.. الحق ان فى رئيس دولة وحكومة بيشتغلوا ليل ونهار لجل احوال الناس تتغير.. تسال هو حصل تغيير؟.. اقولك كتير اوى.. مصر اتغيرت فى حاجات كتير.. وبقى عندنا مشاريع قومية بجد كبيرة ولولا المشاريع والتخطيط السليم كان يبقى عندنا اكبر نسبة بطالة فى العالم.. فى حاجات كتير حلوه انعملت..وفى حاجات لسه بتتعمل.. الموضوع دلوقتى مبقاش ان انا وانت نشتكى.. احنا احوالنا بقت احسن كتير حتى لو العيشه بقت غالية علينا.. اللى يقدر يشتغل شغلانة واتنين يشتغل مش عيب.. بشوف المصريين فى الخارج بيشتغلوا 16ساعة ومش بيشتكوا.. هتقول بيخدوا فلوس اكتر هقولك صحيح بس كمان هناك العيشة اغلى من مصر بكتير.. الصراحة لما انطلق مشروع حياة كريمة فى 4500 قرية قلت البلد دى ربنا هيكرمها علشان رئيسها راجل وطنى وعنده ضمير وحاسس بكل الناس.. يعنى لما رئيس مصر يفكر يغير حياة نص الشعب فى 3 سنين ويدور ازاى كل واحد ياخد حقه يبقى هنا احنا فى مرحلة جديدة خالص عمرها ما عدت على مصر.. انا مش هتكلم على الاصلاحات اللى بتحصل فى كل حته فى مصر ولا المشاريع المنتجة اللى بقينا نفتخر بيها بس احنا بنحب ننسى.. اى حد عنده ضمير هيقول ان البلد بتطلع للامام بسرعة جدا وان حجم الانجازات يفوق التوقعات والامكانيات.. فاضل اتكلم على الناس الطيبين اصحاب المعاشات اللى محتاجين نظرة اضافية من الدولة المصرية.. هنبقى سعداء كلنا لو شوفنا الناس الكبيرة مبسوطة ومش بتشتكى من اسعار الدواء وقلة الدخل.. من حقنا اننا نفتخر ببلدنا وبانفسنا علشان كلنا شاركنا فى الحفاظ على مصر.. عاوز اقول للخونة اللى فى تركيا وقطر ان الكذب اللى شغالين عليه ليل ونهار ولا بيفرق معانا خالص.. انتوا بتكدبوا واحنا بنشتغل وبنبنى مصر وعارفين ان ده مش مريحكم.. كان نفسكم تشوفونا واقعين وبنشحت وبنموت بعض بس ده عمره ما هيحصل لان كل الارهابيين معاكم وفى حضنكم يا خونة.. نرجع لحياة كريمة اللى هى اهم حق من حقوق الانسان واللى البلد دى بتحفظه ومش بتتاجر بالكلام وخلاص.. احنا فى مصر عارفين ان حق الانسان فى الامان والتعليم الجيد والرعاية الصحية وتوفير مصادر الدخل من اهم حقوق الانسان.. علشان كده رئيس مصر الوطنى الرئيس السيسى قرر ان كل المصريين يعيشوا حياة كريمة وبص على المحتاج وهيغير حياته.. بالمناسبة الخاين ايمن نور شكله محتاج قرشين وعمال يزايد على مصر وكالعادة بيستقوى بالخارج.. عاوز اقوله..... ولا بلاش.. وتحيا مصر.