نص رسالة مدير مستشفى العزل بأبوخليفة للأطباء.. تعرف عليها

وجه الدكتور علي حطب مدير مستشفى الحجر الصحي بأبوخليفة رسالة مؤثرة لزملائه الأطباء من خلال صفحته الشخصية بأحد مواقع التواصل الاجتماعي طالبهم خلالها بالانضمام لمستشفيات العزل الصحي للمساعدة والمساهمة في علاج المرضى، موضحا أن الموت له ميعاد سترحل عندما يحين حتى لوكنتم في بروج مشيدة وجاء نص الرسالة..
السلام عليكم ورحمه الله وبركاته
أنا علي حطب مدير مستشفى الطوارئ بأبوخليفة للعزل الصحي تاني مستشفى اشتغلت عزل بعد مستشفى النجيلة، استقبلنا مرضى كورونا كتير جدًا بأعراض مختلفة وبأعمار مختلفة وثقافات مختلفة المرضى دول في أمس الحاجة للأطباء والتمريض، واحنا في أمس الحاجة للتخفيف عنهم أخاطب زمايلي الأطباء في الصحة والمعاهد التعليمية والجامعات والأطباء المستقلين، انضموا لينا ساعدوا في علاج المرضى قدر المستطاع اطوعوا في المستشفيات لأن ده دورنا دلوقتي عارف أننا ظلمنا كتير بس مش وقت العتاب عادي جدًا لو حد فينا اتصاب بالفيروس، الموت في ميعاد بدون فيروس أو مقدمات الموت ممكن واحنا نايمين أو ماشين أو عايشين في بروج مشيدة، المريض ده ممكن يكون قريب أي حد فينا ونبقى نتمنى خدمته
ودي جائحة وهتعدي بكرم ربنا علينا ومجهودكم وعلمكم، في أحد المرضى كنت بتعامل معاها وبتكح وحالتها صعبة وأول ما نفسها تتحسن أول كلمة قالتها متعالجنيش لو هعديك أو هضرك، قلتها أبدًا متخفيش،
قامت دعت لكل الأطباء أعتقد ده الجزاء الأفضل واللي احنا محتاجينه للآخرة اخرجوا من سكناتكم أيها الأطباء انتفضوا وانضموا لكل مستشفيات العزل، والله متعة كبيرة محروم منها كتير مننا وهيا نعمة تخفيف معاناة مريض ابتلاه الله بوباء كورونا ليس مبيد للعالم، كورونا اختبار من ربنا للتطهير من الذنوب والآثام
مرضي كورونا فوق رأسنا كلهم، مرضى كورونا سبب للحسنات وغفران السيئات، مرضى كورونا هم أجدادي هم أبائي هم أمهاتي هم أخواتي هم أبنائي، اللهم اجعل عملكم وعملنا خالص لوجهك الكريم خالي من الرياء أو النفاق.