بالفيديو.. ريهام سعيد لإيمان الحصري: تحدثت للمحور علشان حسن راتب اللي مشغلك

قالت الإعلامية ريهام سعيد، إن هناك بعض البرامج تركت الحديث عن الانتخابات اليوم، وتحدثت عنها، موضحة أنها أجرت مداخلة هاتفية على قناة المحور اليوم، قائلة: "كنت بتكلم على برنامج معرفش مين بتقدمه، بقالها 3 ساعات تقول الإعلام الحقير والإعلام المنحط وإعلامنا وإعلامها".
ووجهت ريهام سعيد رسالة شديدة اللهجة، للإعلامية إيمان الحصري مقدمة برنامج "90 دقيقة"، على فضائية المحور، قائله إنها قليلاً ما تجرى مداخلات هاتفية، ولكنها فعلت ذلك من أجل الدكتور حسن راتب رئيس قنوات "المحور".
وأضافت ريهام سعيد: "قالت لى ابقي كلميه على تليفونه الشخصي هو مالوش دعوة، حتى لو هو مالوش دعوة كان لازم تتكلمي عليه باحترام أكتر من كده بكتير، لأن في الآخر لما هتعملى انتي كارثة القضايا وكل حاجة هتترفع على الدكتور حسن راتب، في الآخر المحور ليه دعوة ولا ملوش دعوة، واللى اتكلمتى عليه باستهزاء ده هو اللي عملني وهو اللي خلاني ريهام سعيد، وهو اللى ادانى الفرصة، وهو اللى جالى مديرين كتير أوى قالوله دى ماتنفعش فقالهم تنفع".
ووجهت حديثها للإعلامية إيمان الحصري: "أنا ماعرفكيش لأن حتى لو بتطلعي على الشاشة بقالك سنة أو سنة ونص، الناس دى بقالى 20 سنة أعرفهم، مش هكلم الدكتور حسن راتب على تليفونه الشخصي زى ما قولتيلي، لأنك اتكلمتي عليا على شاشته وعلى قناته اللى هى بفلوسه اللى هى بتاعته اللى انتى بتشتغلى عنده، ولما تتكلمي عليه اتكلمي عليه باحترام، أنا دلوقتى مش بدافع عن علاء الكحكى، أنا بدافع عن الدكتور حسن راتب، اللى بقالى 6 ساعات بتشتم على قناته، بس أنا مش زعلانه لأنى لو دخلت القناة عنده دلوقتى، 100 واحد هيشيلنى على دماغه من فوق، تانى وتالت ورابع".
وعن "فتاة المول" قالت ريهام سعيد: "أنا دلوقتى لما استضيف بنت عندي مين حط الموضوع ده فى الإعلام، هى البنت، لأنها طلعت فى كل القنوات وقالت عايزه حقي وطلعت مع وائل الإبراشى قبلينا وعلى العاصمة، والمحور، وجت عندي هنا، ومتصورة بكاميرات مدينة الإنتاج، ومعمول لها تصريح بدخول المدينة وقعدت معانا وكل ده مثبوت".
وقالت ريهام سعيد: "أنا قبل كده طلعت مع الجميلة أروى جودة، وناس كتير وكنت ببقى قاعدة كده وبيطلعوا صورة ليا، وفى صورة كنت قاعدة وحاطين شيشة على رجلى، عارفين الصورة دى بتطلع فى أى حتة، أى حد عايز يشتم فيا بيطلع الصورة دى، وببقى قاعدة فى برنامج لا ليا ولا عليا والصورة بتطلع، هو أنا مش بني آدمه؟ هى دى مش صور شخصية؟ طيب انتى جيتى وبقيتى شخصية عامة والناس كلها عرفت إن اسمك سمية، ومن حقى لما انتى عرضتى نفسك قدام الناس كلها، يبقى من حقى أعرض صورة، أعرض كليب، أعرض أى حاجة أقول بها وجهة نظرى، طالما أنا مادخلتش وراكى الحمام انتى متصورة على البلاج، ومتصورة فى الشارع، يعنى فى ناس كتيره شافتك، وانتى مش مكسوفة من الصور، دى أنا شايفة إن اللى بتعمليه دلوقتى هو اللى هيضرك جدًا لأن محدش خد حاجة من موبايلك، لأنك متعرفيش اتبعت لنا إيه وعرفنا إيه".