( وَصَلْتم لأيه ؟ )

مثقَّف بطبعي وبسمع برامج
برغم ان قُطْنة حاطِتْها فْ وداني
بتبدأ سياسة وتقْلِب أغاني
ومصر النّهارده وكاني وماني
صباحي ومسائي وأول وتاني
وَصَلْتم لأيه ؟
مؤرِّخ وصحفي وناقد سياسي
مُحَلّل سياتُّه وعاقل وراسي
وَصَلْتم لأيه ؟
وكل الحوار اللّي داير وفاير
دا فادنا سعاتّك وفادكم بأيه ؟
ما لسَّه الفقير والجعان بالوراثة
ولسَّه اللّي بيه
وناس من بلدنا بتهوى الفضايح
تمسْخَر جدود اللّي جاي واللّي رايح
وفينا اللّي ينصب ويقتل ويعلى
وفينا اللّي يهبِش ويملا الصّفايح
وحتَّى الميدان اللّي كان البدايه
ووحَّد صفوفنا وكان النهاية
ماعادش الميدان
وكل اللّي يخْطُر في بالك بيحصل
في قلب الميدان
دا منظر يحزِّن يبكِّي ويمرِض
يخلّيك تقول ع البلد دي السّلام
وكل العقول اللّي فاهمه غبيَّة
سياسة مصالح ومصر الضَّحيّة
وضاعوا الغلابه ما بين السِّباع
وبين اللّي نهب البلد دي وباع
وكل اللّي حاصل مجرَّد كلام
ورغم ان مصر البهيَّة عليلة
ورغم ان إحنا في موقف خطير
تفتّش بحُرقة في كل الأماكن
ما تلقى الضمير
وريِّس تشوفه في كل البرامج
بيفرد قلوعه
وهاعمل واسوّي واطبطب وادلّع
هادادي المواطن وهامسح دموعه
ياخوفي يكون اما يضحك علينا
لحد امّا يمسك زمام البلد دي
وساعة ما يركب يطلَّع عينينا
وعاهِدت نفسي ما بيني وما بينها
ما ينجح بصوتي فلول النظام
وقلت لصحابي وجيراني وحبايبي
نجرّب بتوع الحلال والحرام
ياحزب الجماعة وصلتم لأيه ؟
ما لسَّه الفقير والجعان بالوراثة
ولسَّه اللّي بيه
يا خيْرَتْ ياشاطر يا مرشد ياعام
كفايه مُناورة ودَهْن فْ كلام
وحبُّوا البلد دي
دا كل المناصب ها تفنى وتعدّي
ومصراللّي باقية
ورغم ان مصر البهيَّة عليلة
ورغم ان إحنا في موقف خطير
تفتِّش بحُرْقة في كل الأماكن
ما تلقى الضمير
ياشعب ويا شورى وَصَلْتم لأيه ؟
وفين العدالة اللّي مُتْنا عشانها
وفين الرّغيف اللّي قُلتم عليه ؟
وحق الشَّهيد اللّي ضحّى بدمُّه
وأحمد حرارة اللّي ضاعت عينيه؟
وكل اللّي سامعه مُجَرَّد قواله
وساعة ما تطلب يقولَّك سياتُّه
كفايه عليكم صَرَفْتوا الحوالة
سؤالي إليكم حكومة ومعارضة
وَصَلْتم لأيه ؟
وبطرح سؤالي برغم اني عارف
محدِّش هايقدر يجاوب عليه
وطيَّارة تنزِل وتاخُد ولادها
ودوغري تحمِّل وترجع بلدها
ما تعرفشِ ليه
وكل اللّي فيها مطلَّع لسانه
لشعب الحضارة بيضحك عليه
وساعة ما تسأل يقولَّك سياسة
وإن المشير عنده حكمة وكياسة
وماسك زمام البلد دي ف إيديه
كفايه مذلَّة وَصَلْتم لأيه ؟
ورغم ان مصر البهيَّة عليلة
ورغم ان إحنا في موقف خطير
تفتِّش بحُرقة في كل الأماكن
ما تلقى الضمير..