امتى الرجوع .. ؟!

تايه بدور عن وصف رسمي
بسأل بفتش عن كياني
و بستغل طوُلة لساني
في البحث يمكن للخروج ،
من نُص همي ..
أو حل وقتي ل بعض ،
يأسي ..
كتير كلامي !
بس القضية، رغم المزيد
كلامي ناقص ..
و النقص فيه، معدي نقصي
تملي يعنى جاهز سؤالي
و ألاقى مني تايهة الردود
ف حيرة دايمًا أنا واشتياق
والحيرة نابعة من هجر،
بلدي ..
ما أفهمش وضعي !!
وّد ومحبة !..
ولا مهانة غدر و فراق ؟
ساعات ف حلمى أتمنى أهرب
و الصبح أصحى أشحت لقاء
ضاع منى إسمى ..
إِسّود رسمى ..
مش لاقى فيا نقطة ولاء
مبقيتش عارف أخر الحدود
أيه هو حالى ..
أيه معنى وطنى ؟!..
أنا حالى واحد منذ الجدود
نفس الغباء ..
الجهل صاحبى من طفولتى
معرفش فرق الباء و تاء
نفس الدماء ..
مولود مذّوق شكل كفنى
رخيص ف عهد كله غلاء
ذات المهانة ..
نفس البلاء ..
ف بلدنا والله نيل كبير
و عمرى ما أشعر ب إرتواء
قتلنى فقرى ، دبحنى جوع
نفس المذّلة ..
هو الخنوع ..
يضربنى طاغيه ،أديله خدى
و رد فعلى بس البكاء
إمتى الرجوع ؟!..
يا غالية بلدى ، يا عالى وطنى
تكونى حاضنة كل الربُوع
تكافئى والدى و تصونى ولدى
إمتى الرجوع .. ؟!